سوال: مفتی صاحب ! ایک خاتون اگر نیٹ پر قرآن کریم پڑھاتی ہو، تو کیا ماہانہ ایام میں قرآن کریم پڑھا سکتی ہے؟
نیز یہ بھی بتائیں کہ اس موبائل کو جہاں قرآن کریم اسکرین پر نظر آرہا ہو یا قرآنی نسخہ کو دستانے پہن کر پکڑ سکتی ہے؟

جواب: قرآنِ مجید پڑھانے والی خواتین کے لیے مخصوص ایام میں قرآنِ مجید کو پکڑنا جائز نہیں ہے، البتہ قرآنِ مجید کی تعلیم کا سلسلہ جاری رکھنے کی صورت یہ ہے کہ وہ قرآنی آیات کو مکمل نہ پڑھائیں، بلکہ لفظ لفظ کر کے یعنی ہجے کرکے پڑھائیں، مثلاً: الحمد۔۔۔۔ للہ۔۔۔۔ رب۔۔۔ العالمین، مخصوص ایام میں خواتین کے لیے ہجے کرکے پڑھنا جائز ہے، البتہ مکمل آیت کا پڑھنا جائز نہیں ہے۔
واضح رہے کہ موبائل فون کی اسکرین پر جہاں آیاتِ مبارکہ نظر آرہی ہوں، اس جگہ کو ناپاکی کی حالت میں چھونا درست نہیں ہے، البتہ بوقتِ ضرورت قرآن مجید کو ایسے کپڑے کے ساتھ چھو سکتی ہے، جو اس نے پہنا نہ ہو، مثلاً: رومال وغیرہ سے، جو بدن سے جدا ہو، لیکن دستانے چوں کہ ملبوس (پہنے ہوئے) ہوتے ہیں اور بدن سے جدا نہیں ہوتے، اس لیے ہاتھ پر دستانے پہن کر اس سے قرآن پاک کو پکڑنا یا چھونا جائز نہیں ہے۔