سوال: ہمارے بزرگ کہتے ہیں کہ مغرب کے وقت آسمان پر شیاطین ہوتے ہیں، جس کی وجہ سےعورتوں اور بچوں کو گھر میں چلے جانا چاہیے اور کھڑکیاں اور دروازے بند کر لینے چاہیے، رہنمائی فرمادیں کہ کیا یہ بات حدیث سے ثابت ہے؟

جواب: جی ہاں! اس طرح کا مضمون ذخیرہ احادیث میں ملتا ہے، لیکن اس میں بچوں کا ذکر ہے، خواتین کا ذکر نہیں ہے۔
واضح رہے کہ جن احادیث میں بچوں کو مغرب (اندھیرا چھانے )کے وقت باہر جانے، کھڑکیاں اور دروازے بند کرنے کا ذکر ہے، ان احادیث کی تشریح میں محدثین نے تحریر کیا ہے کہ لوگوں کی مصلحت کے پیش نظر یہ حکم دیا گیا ہے، لہذا اس پر عمل کرنا مستحب ہے، واجب نہیں ہے، چنانچہ اس سلسلے میں علامہ ابن الجوزی رحمۃ اللہ علیہ نے مغرب کے وقت باہر نکلنے کی ممانعت کی ایک وجہ یہ بیان کی ہے:
"انما خیف علی الصبیان فی تلک الساعۃ، لان النجاسۃ التی تلوذ بہا الشیاطین موجودۃ معہم غالبا، الذکر الذی یحرز منھم مفقود من الصبیان".
ترجمہ:
بچوں کو اس وقت( اندھیرا چھانے کے) جو باہر جانے سے روکا گیا، یہ شیاطین و جنات کے شر سے بچانے کے لیے ہے، بچوں کے بارے میں یہ اندیشہ اس لیے ہوتا ہے کہ عام طور پر بچے پاکیزگی کا خیال نہیں رکھتے، ان کے ساتھ نجاست لگی ہوتی ہے، جبکہ شیاطین ایسے ہی موقع کی تلاش میں ہوتے ہیں، جہاں گندگی ہو، اس کے ساتھ ساتھ شیاطین و جنات کے شر سے بچاؤ کے جو ذکر و اذکار ہیں، بچوں میں ان کے پڑھنے کا بھی شعور نہیں ہوتا، اس لیے ان پر جنات و شیاطین کا اثر پڑنے کا اندیشہ رہتا ہے۔
اس لیے بلا ضرورت مغرب کے وقت بچوں کو باہر نکلنے سے روکے رکھنا چاہیے، اور دروازے کھڑکیاں بند کر دینی چاہیں۔