سوال: آج صبح باجماعت فجر کی نماز ادا کرنے کے بعد مجھے اندازہ ہوا کہ میری پینٹ پر پرندے کی نجاست لگی ہوئی تھی لہذا غالباََ ناپاکی کی وجہ سے میری نماز ادا نہیں ہوئی، براہ مہربانی اس مسئلہ کے بارے میں رہنمائی فرمادیں۔

جواب: واضح رہے کہ مرغی، بطخ، اور مرغابی کے سوا تمام حلال پرندوں کی بیٹ پاک ہے، جیسے: کبوتر، چڑیا وغیرہ، جبکہ مرغی، بطخ اور مرغابی کی بیٹ نجس (نجاست غلیظہ) ہے۔
نجاست غلیظہ کا حکم یہ ہے کہ اگر ایک درہم (یا ہتھیلی کے گہراؤ)کی مقدار یا اس سے کم پھیلاؤ میں کپڑے یا بدن کے کسی عضو پر لگ جائے تو نماز ہو جائے گی لیکن گنجائش ہونے کے باوجود نہ دھونا اور اسی طرح نماز پڑھنا مکروہ ہے، البتہ اس سے زائد مقدار میں نجاست لگنے کی صورت میں بغیر دھوئے نماز ادا نہیں ہوگی۔
تمام حرام پرندوں کی بیٹ نجاست خفیفہ ہے۔
نجاست خفیفہ کا حکم یہ ہے کہ اگر نجاست خفیفہ کپڑے یا بدن میں لگ جائے تو کپڑے یا جسم کے جس حصہ میں لگی ہے اگر اس کے چوتھائی حصہ سے کم ہو تو معاف ہے، البتہ جان بوجھ کر اس حالت میں نماز پڑھنا مکروہ ہے اور اگر چوتھائی یا اس سے زیادہ حصہ پر نجاست لگی ہو تو اس کا دھونا واجب ہے، دھوئے بغیر نماز پڑھنے سے نماز نہیں ہوگی۔