سوال: مندرجہ ذیل حدیث کے بارے میں رہنمائی فرمادیں: "رسول اللہ ﷺ نے ایک آدمی کے ہاتھ میں پیتل کا کڑا دیکھا تو فرمایا: تجھ پر افسوس ہے تو نے کیا کردیا؟ اس نے عرض کیا: یا رسول اللہ ! یہ میں نے بیماری کی وجہ سے پہنا ہے تو رسول اللہ ﷺ نے فرمایا: اس سے تیری بیماری میں اضافہ ہی ہوگا، اس کڑے کو تو اتار دے، کیونکہ اگر تو اس حالت میں مر گیا تو تو کبھی بھی فلاح پانے والوں میں نہیں ہوگا"۔ (مسند احمد: ج، 4، صفحہ، 445)(ابن ماجہ: حدیث نمبر،3531)

جواب: جی ہاں! سوال میں ذکر کردہ حدیث مسند احمد میں ان الفاظ کے ساتھ موجود ہے:
عن عمران بن حصين رضي الله عنه: أن النبي صلی اللہ علیہ وسلم ابصر علی عضد رجل حلقة۔ اراہ قال: من صفر، فقال: ویحک ما هذه؟ قال: من الواهنة، قال: اما إنها لا تزيدك إلا وهناً، انبذھا عنک، فإنك لو مت وهي عليك ما أفلحت أبداً.
(مسند احمد، حدیث عمران بن حصین، رقم الحدیث 20242، 719/6، عالم الکتب، بیروت)
واضح ہو کہ اگر کوئی اس امید سے کڑا، دھاگہ یا زنجیر پہنے کہ یہ چیزیں اس کو مصیبت سے بچائینگی یا اس کو نفع دلوائینگی، تو اس عقیدہ کے ساتھ ان چیزوں کا پہننا ممنوع ہے، بلکہ بعض فقہاء نے اسے کفریہ اعمال میں شمار کیا ہے، کیونکہ نفع اور نقصان پہنچانے والی ذات صرف اللہ تعالیٰ کی ہے۔
اگر یہ عمل فیشن اور آرائش کے طور پر ہو، تب بھی درست نہیں ہے، کیونکہ اس میں عورتوں اور غیر مسلموں کے ساتھ مشابہت پائی جاتی ہے، اس لیے کہ اس طرح ہاتھوں میں کڑا پہننا بعض غیر مسلموں کا مذہبی شعار ہے۔