سوال: مفتی صاحب ! کیا لڑکیوں کے لیے پروفیشنل میک اپ کرنے کا طریقہ سیکھ کر اس سے پیسے کمانا جائز ہے؟

جواب: واضح رہے کہ زیب وزینت اور بناؤ سنگھار عورت کا فطری حق ہے، جو کہ اس کی فطرت کے عین مطابق ہے٬ اسلام نے عورت کو اس فطری خواہش پر عمل کرنے کی اجازت دی ہے٬ لیکن اس کیلئے کچھ حدود مقرر کی ہیں٬ جن کا لحاظ رکھنا ضروری ہے٬ تاکہ ان کی خلاف ورزی کے نتیجے میں اللہ تعالیٰ اور اس کے رسول صلی اﷲ علیہ وسلم کی ناراضگی لازم نہ آئے٬ چنانچہ عورت کے لئے ایسا میک اپ کرنا، جس سے اس کی فطری تخلیق میں تغیر کرنے کی کوشش ہو، یا مردوں کے ساتھ مشابہت لازم آئے٬ جائز نہیں ہے، مثلاً : اپنے فطری اور خلقی بالوں کے ساتھ دوسرے انسانوں کے بال لگانا٬ بلا عذرِ شرعی سر کے بالوں کو کاٹنا٬ بھوؤں کے بال منڈانا وغیرہ٬ اسی طرح غیر محرم مردوں کیلئے یا دوسری عورتوں کے سامنے تفاخر کے طور پر میک اپ کرنا٬ نیز میک اپ سیکھنے یا کرنے کے دوران غیر محرم مردوں کے ساتھ اختلاط کرنا، یہ سب امور بھی جائز نہیں ہیں٬ ان سے اجتناب لازم ہے۔
اس تمہید کے بعد آپ کے سوال کا جواب یہ ہے کہ شرعی حدود کے اندر رہتے ہوئے میک اپ سیکھنا٬ اور خواتین کا میک اپ کرنے کے عوض باہمی رضامندی سے طے شدہ اجرت وصول کرنا فی نفسہٖ جائز ہے٬ البتہ موجودہ دور میں بیوٹی پارلر کے نام سے عورتوں کے بناؤ سنگھار کے جو ادارے قائم ہیں٬ ان میں عموما بعض جائز امور کے ساتھ ساتھ بہت سے خلاف شریعت امور کا بھی ارتکاب ہوتا ہے٬ اس لئے اس قسم کے اداروں میں پروفیشنل میک اپ سیکھنے کیلئے جانا ایک مستقل فتنہ ہے٬ اور خلافِ شریعت امور کا ارتکاب کرنے اور کرانے والی دونوں گناہ گار ہونگی٬ جس سے اجتناب ضروری ہے٬ البتہ اگر کوئی ایسا ادارہ ہو٬ جہاں شرعی حدود کی رعایت رکھی جاتی ہو٬ وہاں پر یہ کام سیکھنے کی گنجائش ہے۔
واضح رہے کہ بناؤ سنگھار کے جو امور شرعی حدود اور جائز درجے میں ہوں٬ ان میں بھی مقصود اپنے شوہر کو خوش کرنا ہو٬ (جوکہ ایک جائز اور شریعت کی نگاہ میں پسندیدہ عمل ہے) چنانچہ غیر محرم مردوں کیلئے بناؤ سنگھار کرنا یا دوسری عورتوں کے سامنے تفاخر کے طور پر ایسا کرنا اللہ تعالیٰ اور اس کے رسول صلی اللہ علیہ وسلم کی ناراضگی کا باعث ہے٬ نیز عورتوں کیلئے اصل حکم یہ ہے کہ زیب و زینت ایک محدود دائرہ میں رہ کر کی جائے٬ اس مقصد کیلئے باہر جانا فتنے کا باعث ہے٬ اس لئے عورت کو شرعی حدود میں رہتے ہوئے جو بھی زیب و زینت کرنی ہو٬ وہ گھر میں ہی کرنی اور کرانی چاہیے٬ اور اس میں بھی مروجہ فیشن پرستی٬ تصنع اور بے جا اسراف سے بچنا ضروری ہے۔
خلاصہ کلام:
شرعی حدود کے ساتھ عورت کیلئے میک اپ سیکھنا اور دوسری خواتین کا میک اپ کرکے باہمی رضامندی سے طے شدہ اجرت وصول کرنا فی نفسہ جائز اور اس کی کمائی حلال ہے٬ لیکن میک اپ سیکھنے کے دوران ناجائز امور سے اجتناب لازم ہے٬ ناجائز کاموں کے عوض حاصل کی گئی کمائی حرام ہوگی٬ اس لئے حتی الامکان گھر میں رہ کر شرعی حدود کی رعایت کے ساتھ یہ کام کرنا چاہیے۔