سوال:
مفتی صاحب ! اگر کسی کے پاس 9 تولہ سونا ہو، اس میں سے 3 تولہ بچوں کے نام پر رکھ دیا ہو، (بچے ابھی چھوٹے 3 سال کے ہیں) اب زکوۃ پورے 9 تولہ کی دینی ہوگی یا صرف 6 تولہ کی زکوٰۃ دینی ہوگی؟
رہنمائی فرما دیجیئے۔
جواب: واضح رہے کہ اگر واقعتاً تین تولہ سونا بچوں کے نام کر کے ان کو مالک بنا دیا ہے، تو اس تین تولہ سونے کے مالک بچے بن گئے ہیں، اس لیے باپ کے ذمے اس کی زکوۃ واجب نہیں ہے، اور اگر بچے نابالغ ہیں، تو ان کے ذمہ بھی زکوٰۃ واجب نہیں، جب تک وہ بالغ نہ ہو جائیں۔
واضح رہے کہ اگر ملکیت میں فقط چھ تولہ سونا ہو، اور اس کے ساتھ چاندی یا نقد روپیہ یا دیگر کوئی قابلِ زکوۃ چیز نہ ہو، تو محض چھ تولہ سونے پر زکوۃ واجب نہیں ہوگی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
سنن ابی داؤد: (باب فی زکوٰۃ السائمة، 221/1)
عن علي رضي اللّٰہ عنہ عن النبي صلی اللّٰہ علیہ وسلم قال: إذا کانت … ولیس علیک شيء یعني في الذہب حتی تکون لک عشرون دیناراً، فإذا کانت لک عشرون دینارا و حال علیہا الحول ففیہا نصف دینار فما زاد فبحساب ذٰلک۔
الدر المختار مع رد المحتار: (باب زکوٰۃ المال، 295/2، ط: سعید)
نصاب الذھب عشرون مثقالاً
فما دون ذٰلک لا زکاۃ فیہ، ولو کان نقصاناً یسیرا۔
و فیه ایضاً: (کتاب الزکوٰۃ، 258/2)
و شرط افتراضھما عقل وبلوغ واسلام ،
( قولہ عقل وبلوغ ) فلا تجب علی مجنون وصبی لانھا عبادۃ محضۃ ولیسا مخاطبین بھا۔
الجوھرہ النیرہ: (کتاب زکوٰۃ العروض، 151/1- 153، ط: دار الکتاب، دیوبند)
وتضم قیمۃ العروض إلی الذہب والفضۃ وکذا یضم بعضہا إلیٰ بعض وإن اختلف أجناسہا( قولہ) وکذلک الذہب والفضۃ بالقیمۃ حتی یتم النصاب عند أبی حنیفہؒ کماإذا کان معہ مائۃ درہم وخمسۃ مثاقیل قیمتہا مائۃ درہم فعلیہ الزکوٰۃ عند أبی حنیفۃ ؒ الخ۔
واللہ تعالٰی اعلم بالصواب
دارالافتاء الاخلاص،کراچی