سوال: میرے والد صاحب کے اکاؤنٹ میں پچھلے سال مارچ 2015 میں دس لاکھ (100,00,00) کا اماؤنٹ آیا، جس میں سے پچاس ہزار اُسی سال جولائی میں خرچ ہوئے، پھر اگست میں مزید دس لاکھ (100,0000) آئے اور والد صاحب بیمار تھے، ہوش و حواس میں نہیں تھے، البتہ اتنا ہوش ضرور تھا بیوی، بچوں اور بہنوں کے آنے پر ان کو پہچان لیتے تھے اور روشنی کی وجہ سے دن رات کا احساس بھی ہوجاتا تھا۔ کبھی حالت صحیح ہوتی تو سوالوں کے صحیح جواب بھی دیدیتے تھے، مگر قضائے حاجات بستر پر ہوتی تھی۔ پھر برضائے الٰہی نومبر 2016ء میں ان کا انتقال ہوگیا، اس لیے زکوٰة ادا نہ ہوسکی۔ براہ مہربانی راہنمائی فرمائیں کہ کُل کتنی زکوٰة ادا کرنی چاہیے؟ پسماندگان میں اہلیہ اور پانچ لڑکے ہیں، سب کُل رقم سے زکوٰة ادا کرنے پر متفق ہیں۔ براہ مہربانی راہنمائی فرمائیں کہ زکوٰة کی رقم نکال کر باقی رقم ورثاء میں کس طرح تقسیم ہوگی؟

جواب: واضح ہو کہ زکوٰة واجب ہونے کے بعد اگر مرحوم زکوٰة ادا نہ کرسکا ہو اور اپنے مرنے کے بعد زکوٰة ادا کرنے کی وصیت بھی نہ کی ہو تو ورثاء پر مرحوم کی طرف سے زکوٰة ادا کرنا لازم نہیں ہے، البتہ اگر ورثا تبرعاً بخوشی بشرطیکہ سب ورثاء بالغ ہوں، مرحوم کی طرف سے زکوٰة ادا کرنا چاہیں، تو گنجائش معلوم ہوتی ہے، لہٰذا ساڑھے انیس لاکھ (1950000) روپوں میں اڑتالیس ہزار سات سو پچاس (48750) روپے زکوٰة واجب ہوگی، بقیہ انیس لاکھ بارہ سو پچاس (1901250) روپوں میں سے مرحوم کی بیوی کو دو لاکھ سینتیس ہزار چھ سو چھپن (237656) روپے اور ہر ایک بیٹے کو تین لاکھ بتیس ہزار سات سو اٹھارہ (332718) روپے ملیں گے۔