سوال: السلام عليكم ورحمة اللہ وبركاته، محترم جناب مفتى صاحب !
عرض یہ ہے کہ اگر لڑکی والے شادی کے دن لڑکے والوں کے 15 ، 20 افراد کو اپنے گھر بلا کر رخصتی سے پہلے اپنے مہمانوں کے اکرام میں کھانا کھلائیں تو یہ عمل خلافِ سنت تو نہیں ہوگا؟
وضاحت فرمادیں، نوازش ہوگی۔ جزاک اللہ خیرا

جواب: رخصتی کے موقع پر لڑکی والوں کی طرف سے باراتیوں یا مہمانوں کو کھانا کھلانا ولیمہ کی طرح مسنون اور مستحب نہیں ہے، لیکن حرام اور ناجائز بھی نہیں ہے، بلکہ جائز اور مباح امور میں سے ہے، اگر لڑکی والے نمود ونمائش سے بچتے ہوئے، کسی قسم کی زبردستی اور دباؤ کے بغیر اپنی خوشی و رضا سے اپنے اعزاء اور مہمانوں کوکھانا کھلائیں تو مہمانوں کے لیے، اس طرح کی دعوت کا کھانا کھانا جائز ہے، اور اگر لڑکی والے خوشی سے نہ کھلائیں تو زبردستی کرکے لڑکی والوں سے کھانا کھانا جائز نہیں ہے۔