سوال: اگر غزوہ سے وہ جنگیں مراد ہیں، جن میں رسول اللہ ﷺ شامل ہوئے تھے تو پھر غزوہ ھند سے کیا مراد ہے؟

جواب: واضح رہے کہ سیرت کی عام کتابوں میں اگرچہ ’’غزوہ‘‘ سے مراد کفار کے خلاف وہ معرکہ ہوتا ہے، جس میں رسول اللہ صلی اللہ علیہ وسلم بنفسِ نفیس تشریف لے گئے ہوں، لیکن کتبِ احادیث اور سیرت میں بعض اوقات ’’غزوہ‘‘ کا اطلاق ان معرکوں پر بھی ہوا ہے، جن میں رسول اللہ صلی اللہ علیہ وسلم بنفسِ نفیس تشریف نہیں لے گئے، جیسے: "غزوہ موتہ" وغیرہ۔
چناں چہ حافظ ابن حجر رحمہ اللہ ’’صحیح بخاری‘‘ میں ’’کتاب المغازی‘‘ کے عنوان کے تحت فرماتے ہیں کہ ’’مغازی‘‘ سے مراد یہاں ان لشکروں کی تشکیل ہے، جو رسول اللہ صلی اللہ علیہ وسلم کی طرف سے کفار کی طرف بھیجے گئے، خواہ آپ صلی اللہ علیہ وسلم بنفسِ نفیس تشریف لے گئے یا آپ صلی اللہ علیہ وسلم نے کوئی لشکر بھیج دیا۔
لہذا "غزوہ ہند" کو "غزوہ" کہنے میں کوئی مضائقہ نہیں ہے، بالخصوص جبکہ احادیث میں بھی اس معرکہ کے لیے "غزوہ" کا لفظ استعمال ہوا ہے۔