سوال: مفتی صاحب !بعض موبائل والے ایزی پیسہ کے ذریعے ایزی لوڈ کرتے ہیں اور بعض موبائل والے موبائل کے ذریعے لوڈ کرتے ہیں، جو موبائل والے ایزی پیسہ کے ذریعے لوڈ کرتے ہیں یا پھر نیٹ کا پیکج کرواتے ہیں تو ایسا کرنے سے پیکج بھی سستا ملتا ہے اور ایزی لوڈ پر بھی ڈسکاؤنٹ ملتا ہے یا mbbs ملتے ہیں یا منٹس ملتے ہیں۔
پوچھنا یہ ہے کہ ایزی پیسہ سے اس طرح کا ایزی لوڈ، نیٹ کا پیکج کروا سکتے ہیں یا نہیں؟
دوسری بات یہ کہ آج کل سب جگہ لوگ موبائل رکھنے کے بجائے، ایزی پیسہ کے ذریعے زیادہ تر لوڈ کر دیتے ہیں، ایسے معاملے میں ایزی پیسہ کی سہولت سے فائدہ حاصل کرنا جائز ہے یا سود ہے؟ برائے کرم رہنمائی فرمائیں جزاک اللہ

جواب: ایزی پیسہ اکاؤنٹ کھلوانا فی نفسہ جائز ہے٬ اور اس میں جمع شدہ رقم کی حیثیت قرض کی ہے٬ البتہ اس سے حاصل ہونے والی سہولیات سے فائدہ اٹھانے سے متعلق تفصیل یہ ہے کہ :
1... جس سہولت کو حاصل کرنے کیلئے اکاؤنٹ میں متعین رقم رکھنا مشروط نہ ہو٬ بلکہ ایزی پیسہ اکاؤنٹ کے ذریعے محض کسی بھی طرح رقم استعمال کرنے پر کسٹمر کو کمپنی کی طرف سے کوئی سہولت دی جائے٬ جیسے: کیش بیک وغیرہ ٬ تو اس صورت میں حاصل ہونے والی سہولت سے فائدہ اٹھانا جائز ہے٬ کیونکہ یہ کمپنی کی طرف سے سروس استعمال کرنے پر حط ثمن (قیمت میں کمی) یا انعام ہے۔
2... جن سہولیات کو حاصل کرنے کیلئے اکاؤنٹ میں متعین رقم رکھنا مشروط ہو٬ تو اس صورت میں کمپنی کی طرف سے حاصل ہونے والی سہولیات مثلا: فری منٹس٬ فری میسج یا رقم منتقل کرنے کی سہولت وغیرہ استعمال کرنا جائز نہیں ہے٬ کیونکہ ایزی پیسہ اکاؤنٹ میں جمع شدہ رقم کی حیثیت چونکہ قرض کی ہے٬ اور اس پر ملنے والی سہولیات قرض کے ساتھ مشروط ہیں٬ جبکہ قرض دیکر اس پر مشروط نفع حاصل کرنا سود ہونے کی وجہ سے ناجائز اور حرام ہے٬ لہذا اس طرح کی سہولیات سے (جو اکاؤنٹ میں متعین رقم رکھنے کے ساتھ مشروط ہوں) استعمال کرنے سے اجتناب لازم ہے۔
(ماخذہ: تبویب فتاوی جامعہ دارالعلوم کراچی٬ ٤١/٢٠٦١ )