سوال:
السلام علیکم، مفتی صاحب!
کیا ایک عورت اپنے محرم کے بغیر کسی رشتہ دار بزرگ خاتون کے ساتھ وطن اقامت سے وطن اصلی کی طرف مجبوری میں سفر کر سکتی ہے؟
جواب: عورت کے لیے محرم کے بغیر شرعی سفر کرنا ناجائز ہے، اگرچہ اس کے ساتھ کوئی بزرگ خاتون ہو۔
پس صورت مسئولہ میں اگر عورت کا سفر شرعی مسافت (یعنی اڑتالیس میل یا 77.24 کلو میٹر) یا اس سے زائد کا ہو، تو اس کیلیے بغیر محرم کے سفر کرنا جائز نہیں ہے۔
مسلم شریف کی روایت میں ہے:
عن عبد الله بن عمر عن النبي صلى الله عليه وسلم، قال: «لا يحل لامرأة تؤمن بالله واليوم الآخر، تسافر مسيرة ثلاث ليال، إلا ومعها ذو محرم»۔
(صحيح مسلم، ج : 2، ص : 975)
ترجمہ:
جو عورت ﷲ اور قیامت کے دن پر یقین رکھتی ہو، اس کے لیے حلال نہیں ہے کہ وہ محرم کے بغیر تین رات (اڑتالیس میل یا 77.24 کلو میٹر) کا سفر کرے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
صحیح البخاری: (59/4، ط: دار طوق النجاۃ)
عن ابن عباس رضي الله عنهما، أنه: سمع النبي صلى الله عليه وسلم، يقول: «لا يخلونّ رجل بامرأة، ولا تسافرنّ امرأة إلا ومعها محرم»، فقام رجل فقال: يا رسول الله، اكتتبتُ في غزوة كذا وكذا، وخرجت امرأتي حاجةً، قال: اذهب فحجّ مع امرأتك".
واللہ تعالٰی اعلم بالصواب
دارالافتاء الاخلاص،کراچی