عنوان: "لُعْبَة" نامی حور سے متعلق سندِ واقعہ کی تحقیق

سوال: محترم مفتی صاحب! "لعبہ " نامی حور سے متعلق علامہ ابن قیم نے اپنی کتاب "حادی الارواح إلی بلاد الأفراح" میں، جبکہ ابن ابو الدنیا نے "صفة الجنة" میں ایک واقعہ کو نقل کیا ہے، جس کی سندی حیثیت معلوم کرنا مطلوب ہے۔ عبارت یوں ہے: عن ابن مسعود، قال: إن في الجنة حوراء يقال لها: اللُعْبَة، كل ‌حور الجنان يعجبن بها يضربن بأيديهن على كتفها ويقلن " ‌طوبى لك يا لُعْبَة لو يعلم الطالبون لك لجدوا، بين عينيها مكتوب: من كان يبتغي أن يكون له مثلي فليعمل برضاء ربي عز وجل۔

جواب: واضح رہے کہ متعدد احادیث مبارکہ سے ثابت ہے کہ جنت کی حور کا نام "لُعْبَة"(لام کے پیش کے ساتھ) ہے، جس پر جنت کی دیگر حوریں رشک کرتی ہیں۔ باقی سوال میں پوچھی گئی روایت کو ابوبکر ابن ابی الدنیا نے اپنی کتاب "صفة الجنة" میں اپنی سند سے نقل کیا ہے، جس کے مطابق یہ روایت حضور ﷺ سے ثابت نہیں ، بلکہ حضرت عبداللہ بن مسعود رضی اللہ عنہ پر موقوف ہے (یعنی مذکورہ صحابی نے روایت کی سند کو نبیﷺ کی جانب نسبت کرکے بیان نہیں کیا ہے)، نیز مذکورہ روایت کی سند میں موجود راویوں پر کلام کیا گیا ہے، اور حسان بن عطیہ کا حضرت ابن مسعود رضی اللہ عنہ سے سماع ثابت نہ ہونے کی وجہ سے روایت کو منقطع قرار دیا گیا ہے، تاہم دیگر سندوں اور مجموعہ روایات کو مدِّ نظر رکھتے ہوئے روایت کوتقویت ملتی ہے، لہذا مذکورہ روایت کو حضرت عبداللہ بن مسعود کی جانب نسبت کرکے آگے نقل کرنا درست ہے۔ ذیل میں روایت کا ترجمہ پیش کیا جاتا ہے:
حضرت ابن مسعود رضی اللہ عنہ سے موقوفاً روایت ہے کہ جنت میں ایک حور ہے ، جس کو "لُعْبَة" نام سے جانا جاتا ہے، جنت کی تمام حوریں اس پر رشک کرتی ہیں، اور اس کے کندھے پر ہاتھ مار کر کہتی ہیں : اے لعبہ! تم کتنی شاندار ہو، اگر تمہیں چاہنے والے جان لیں تو تمہیں پانے کے لئے سخت محنت کریں۔
(صفة الجنة لابن أبي الدنيا، لأبي بكر عبد الله بن محمد بن عبيد بن سفيان بن قيس البغدادي، المعروف بابن أبي الدنيا (ت 281هـ)، باب صفة حور العین، رقم الصفحة: 212، تحقيق ودراسة: عمرو عبد المنعم سليم، الناشر: مكتبة ابن تيمية، القاهرة- مصر، مكتبة العلم، جدة – السعودية)
نیز "تنبیہ الغافلین" میں ابواللیث سمرقندی رحمہ اللہ نے حضرت ابن عباس رضی اللہ عنہما پر موقوف روایت کو بغیر سند کے مزید تفصیل سے نقل کیا ہے، اس روایت کا ترجمہ بھی درجِ ذیل ہے:
"جنت میں ایک حور ہے جس کا نام "لُعبة" ہے۔ وہ چار چیزوں سے پیدا کی گئی ہے: مشک، عنبر، کافور اور زعفران۔ اس کی مٹی کو آبِ حیات سے گوندھا گیا، پھر اللہ تعالیٰ نے اس سے فرمایا:(روح سمیت یک جان) بن جا، سو وہ بن گئی۔ تمام حوریں اس کی عاشق ہیں، اگر وہ سمندر میں ایک بار تھوک دے تو سمندر کا پانی میٹھا ہوجائے، اس کے سینے پر لکھا ہے: ‘جو شخص میرے جیسی (نعمت) پانا چاہے، وہ میرے رب کی اطاعت کرے"۔
(تنبيه الغافلين بأحاديث سيد الأنبياء والمرسلين للسمرقندي، باب صفة الجنة وأهلها، رقم الصفحة 77، الناشر: دار ابن كثير، دمشق – بيروت)