سوال: مفتی صاحب ! بینک میں میرے پیسے رکھے ہوئے ہیں، ان پر اضافی پیسے بھی ملتے ہیں، کیا وہ اضافی پیسے جائز ہیں؟ اور اگر وہ اضافی پیسے جائز نہیں ہیں، تو کسی فقیر کو دیں تو ثواب ملے گا؟

جواب: واضح رہے کہ سودی بینک میں سودی اکاؤنٹ کھلوانا ناجائز ہے، اگر کسی نے لاعلمی میں کھلوالیا ہو، تو اسے چاہیے کہ صدقِ دل سے توبہ و استغفار کرے اور سودی اکاؤنٹ بند کردے یا کرنٹ اکاؤنٹ میں تبدیل کردے، سودی رقم کے بارے میں حکم یہ ہے کہ کسی مستحقِ زکاۃ کو ثواب کی نیت کے بغیر دے دی جائے۔

واضح رہے کہ مذکورہ بالا تفصیل اس وقت ہے، جب لا علمی یا بھولے سے سودی رقم نکلوالی ہو، اور اس سے جان چھڑوانا مقصود ہو، جان بوجھ کر سودی رقم وصول کرنا، تاکہ غریبوں کو صدقہ کیا جاسکے، شرعاً جائز نہیں ہے، کیونکہ وصول کر کے صدقہ کرنا ایسا ہے، جیسے گناہ کر کے کفارہ کیا جائے، اس سے بہتر یہ ہے کہ شروع ہی سے گناہ نہ کیا جائے۔