سوال: اگر کوئی کافر اسلام قبول کرنے کی نیت سے کسی عالم کے پاس جائے، لیکن راستے میں اس کا انتقال ہوجائے اور اس نے زبان سے کلمہ کا اقرار نہ کیا ہو تو اس کے بارے میں شریعت کا کیا حکم ہے؟ ایسا شخص مسلمان شمار ہوگا یا کافر؟

جواب: واضح رہے کہ کسی کافر کے ایمان لانے کے لیے صرف دل سے ایمان لانا کافی نہیں ہے، بلکہ دنیاوی احکام میں اس کے ایمان کے مفید ومعتبر ہونے کے لیے "اقرار باللسان" (زبان سے اس کا اقرار کرنا) بھی شرط ہے، کیونکہ اسلام کا ایک حكم دنيا كے اعتبار سے ہے اور ایک حكم آخرت كے اعتبار سے ہے۔
دنیا کے اعتبار سے ایمان اور اسلام کا حکم یہ ہے کہ جو شخص دنیا میں ایمان اور اسلام قبول کر کے "اقرار باللسان" (زبان سے اقرار) کر لے تو اس کے ساتھ مسلمانوں جیسا سلوک ہوگا، مثلا: اس کی جان و مال کا تحفظ، اس کے ساتھ نکاح، وراثت، اس کی اقتداء میں نماز، اگر فوت ہو جائے تو اس کی نماز جنازہ وتدفین وغیرہ میں اس کے ساتھ مسلمانوں جیسا معاملہ کیا جائے گا، اور آخرت کے اعتبار سے اس کا حکم یہ ہوگا کہ وہ "مخلد فی النار" نہیں ہوگا، یعنى وہ ہمیشہ ہمیشہ کے لیے آگ میں نہیں جلے گا، بلکہ کبھی نہ کبھی جنت میں داخل کردیا جائے گا۔
اور اگر کسی کے دل میں ایمان ہو اور اس نے "اقرار باللسان" نہ کیا ہو تو اس پر دنیا میں مسلمانوں کے احکام جارى نہیں ہوں گے، البتہ آخرت میں اس کے ایمان کا اعتبار ہوگا یا نہیں؟ اس میں تفصیل ہے:
اگر اس نے "اقرار باللسان" کسی عذرِ شرعی کی وجہ سے ترک کیا ہو، مثلا: وہ شخص گونگا ہو یا وہ شخص دل میں ایمان لانے کے بعد فورا مرگیا اور "اقرار باللسان" کی اسے مہلت ہی نہیں ملی، یا مہلت تو ملى مگر "اقرار باللسان" کى صورت میں اسے جان جانے کا خوف تھا، اس لیے اقرار نہیں کیا تو بالاتفاق ایسے شخص پر ایمان کا اخروی حکم جاری ہوگا، یعنی وہ اللہ تعالیٰ کے نزدیک مؤمن شمار ہوگا اور "مخلد فی النار" نہیں ہوگا، اور دنیا میں زبان سے اقرار کا نہ پایا جانا اس کے لیے آخرت میں مضر نہیں ہوگا۔
اور جس شخص نے مہلت اور قدرت کے باوجود "اقرار باللسان" نہ کیا ہو تو اس کی دو صورتیں ہیں: ایک یہ کہ اس سے اقرار کا مطالبہ کیا گیا تھا، لیکن اس نے باوجود قدرت ہونے کے اقرار نہیں کیا تو یہ "کفرِ عناد" (جان بوجھ کر کفر اختیار کرنا) ہے، ایسا شخص بالاتفاق "مخلد فی النار"ہوگا (یعنى وہ ہمیشہ ہمیشہ کے لیے جہنم کی آگ میں جلے گا)، لہذا اس کا صرف دل میں ایمان لانا مفید اور معتبر نہیں ہوگا۔
دوسری صورت یہ ہے کہ اس سے مطالبہ ہی نہیں کیا گیا، مگر اس کے دل میں یہ نیت تھی کہ اگر اس سے مطالبہ کیا جائے گا تو وہ اقرار کرے گا، ایسے شخص کے بارے میں اہلسنت والجماعت کے دو قول ہیں:
۱) جمہور محدثین کے نزدیک اس کا ایمان معتبر ومفید نہیں اور یہ شخص "مخلد فی النار" ہوگا۔
۲) امام ابو حنیفہ اور بعض متکلمین مثلا: امام اشعری اور امام ابو منصور ماتریدی رحمہم اللہ کے نزدیک ایسے شخص کا ایمان معتبر ہوگا اور ایسا شخص "مخلد فی النار" نہیں ہوگا۔
(ماخوذ باختصار از "درس مسلم شرح صحیح مسلم": 184/1۔ 185، مؤلفہ: حضرت مفتی محمد رفیع عثمانی صاحب نور اللہ مرقدہ، ط: ادارۃ المعارف، کراچی)
مذکورہ بالا تفصیل کی روشنی میں اگر کوئی شخص دل سے ایمان قبول کر لے اور اسے کسی کے سامنے "اقرار باللسان" (زبان سے ایمان لانے کا اقرار) کرنے کی مہلت نہ ملے تو ایسا شخص اخروی حکم کے اعتبار سے مؤمن ہوگا، البتہ دنیا میں اس پر مسلمانوں کے احکامات جاری نہیں ہوں گے، کیونکہ دنیوی احکام جاری ہونے کے لیے ضروری ہے کہ وہ مسلمانوں کے حاکم یا کم از کم دو عادل مسلمانوں کے سامنے اقرار کرے۔