سوال: کیا یہ بات صحیح ہے کہ انسان کے مرنے کے بعد اس کی روح کسی دوسرے شخص میں منتقل ہوجاتی ہے؟

جواب: واضح رہے کہ "عقیدہ آخرت" (مرنے کے بعد دوبارہ زندہ ہونا) تمام آسمانی مذاہب، آسمانى کتابوں اور تمام انبیاء کرام علیہم السلام کی شریعتوں کا بنیادى عقیدہ ہے، چنانچہ تمام انبیاء کرام علیہم السلام نے عقیدہ توحید اور رسالت کے بعد "عقیدہ آخرت" (مرنے کے بعد دوبارہ زندہ ہونے) پر ایمان لانے کی تبلیغ کی ہے، جس کا حاصل یہ ہے کہ یہ عالم ایک مرتبہ فنا ہو جائے گا، پھر اللہ تعالى دوبارہ پہلى حالت پر زندہ کریں گے اور تمام مخلوق دوبارہ زندہ ہوگی اور انہیں دنیا میں اپنے کیے ہوئے ہر اچھے اور برے کام کی جزا اور سزا ملے گی، یہ عقیدہ اسلام کے بینادى عقائد میں سے ہے جو قرآن کریم کى متعدد آیات، احادیث متواترہ، انبیاء کرام علیہم السلام، صحابہ کرام رضی اللہ عنہم اجمعین اور تابعین رحمہم اللہ کے اجماع سے ثابت ہے، لہذا اس کا انکار کفر ہے۔
ہندو مذہب کے ماننے والے "عقیدہ آخرت" کے منکر ہیں، وہ اس کے بجائے "آواگون" (عقیدہ تناسخ) پر یقین رکھتے ہیں، ان کا کہنا یہ ہے کہ قیامت اور آخرت کوئى چیز نہیں ہے، بلکہ کسى بھى شخص کى موت کے بعد اس کى روح کسی دوسرے جسم میں منتقل ہوتى رہتى ہے، نیک لوگوں کى روحیں بطور ِانعام اچھے جسموں میں منتقل ہوتی ہیں اور برے لوگوں کی روحیں بطورِ سزا برے جسموں، مثلا: گدھا، کتا، بلى وغیرہ میں منتقل ہوجاتی ہیں، روحوں کے مختلف جسموں میں منتقل ہونے کے اس عقیدے کو "آواگون" (عقیدہ تناسخ) کہتے ہیں۔
"عقیدہ تناسخ" سراسر باطل ہے اور قرآن کریم کى واضح آیات کے بالکل خلاف ہے، نیز یہ عقیدہ بالکل مہمل اور خلافِ عقل بھی ہے، اس لیے کہ سزا اور جزا کا قانون یہ ہے کہ جس کو سزا دى جائے تو اسے سزا کا احساس ہونا چاہیے کہ مجھے میرے برے عمل کى وجہ سے یہ سزا ملى ہے، جبکہ "عقیدہ تناسخ" کے مطابق موت کے بعد جس شخص کى روح کو کسی برے جسم میں منتقل کیا جاتا ہے تو اسے اس بات کا قطعى علم نہیں ہوتا ہے کہ میں پہلے کون سے جسم میں تھا اور اس بد شکل جسم میں کس گناہ کى وجہ سے آیا ہوں؟حالانکہ اگر کوئى شخص کسى شہر میں سالہا سال تک رہ کر دوسرے شہر میں منتقل ہو تو اسے اپنے سابقہ شہر کے اکثر واقعات یاد ہوتے ہیں اور وہ دوسروں کو بھى بتاتا ہے، لہذا یہ بات خلافِ عقل بھی ہے کہ ایک شخص ستر سال کى زندگى گذارے اور "آواگون" (عقیدہ تناسخ) کى بنا پر مرنے کے بعد کسى دوسرے جسم میں اس کى روح منتقل ہو جائے اور اسے سابقہ احوال بھول جائیں، لہذا معلوم ہوا کہ یہ عقیدہ بے بنیاد اور قرآن و سنت کی تعلیمات کے خلاف ہے۔