سوال: مفتیانِ کرام سے کچھ سوالات كے جوابات درکار ہیں:
1) دارالکفر کسے کہتے ہیں؟ (ایک عام تعریف یہ ہے کہ جہاں عبادت وغیرہ پر پابندی نا لگائی جائے اور کھل کر شعائرِ اسلام پر عمل نا ہوسکے) کیا یہ درست ہے یا مزید کچھ اور بھی اس میں شامل ہے؟
2) موجودہ وبا کے دوران کافی سارے مسلمان ممالک میں دیکھا گیا ہے کہ زیادہ پابندیاں اجتماعی نماز وغیرہ پر لگائی گئی ہیں، (مثلاً: سننے میں یہ آیا ہے کہ عمان وغیرہ میں ابھی تک مساجد بند ہیں اور جماعت پر پابندی ہے ) کیا اب جب کہ تقریباً سارے کاروبار اور معامولات شروع ہو چکے ہیں تو نماز پہ پابندی لگانے سے کوئی ملک " دار الکفر " والے زمرے میں تو نہیں آرہا؟
3) بہت سارے ممالک جو کہ مسلم ممالک نہیں ہیں، ان میں آزادانہ نماز ادا كے جارہی ہے، عید کے اجتماعات بھی منعقد ہوئے ہیں، ایسی صورت میں بھی کیا یہ ممالک " دار الکفر " ہی کہلائیں گے؟

جواب: (1-3) : واضح رہے کہ دارالکفر کی دو قسمیں ہیں :
(١) ایک وہ دارالکفر جس سے صلح کا معاہدہ نہ ہو اور نہ وہاں مسلمانوں کو امن کیساتھ اپنے دینی شعائر قائم کرنے کی اجازت ہو، ایسا دارالکفر خالص لفظی معنی میں"دارالحرب" ہوتا ہے۔
(٢) دارالکفر کی دوسری قسم وہ ہے، جہاں اگرچہ حکومت تو غیر مسلموں کی ہے، لیکن وہاں مسلمان اپنے دینی شعائر قائم رکھنے میں آزاد ہوں، اور حکومت کی طرف سے ان پر اپنے دینی احکام پر عمل کرنے میں کوئی رکاوٹ نہ ہو، ایسی جگہ کو "دارالامن" کہا جاتا ہے۔
ابتداء اسلام میں اس کی مثال حبشہ تھا، مکہ مکرمہ میں چونکہ دین پر عمل کرنے والوں کو طرح طرح کی تکلیفیں دی جارہی تھیں، اس لیے بہت سے صحابہ کرام رضی اللہ عنہم آنحضرت ﷺ کے ایماء پر مکہ مکرمہ سے حبشہ ہجرت کرگئے تھے، حالانکہ اس وقت حبشہ پر بھی غیر مسلموں کی حکومت تھی، اور اس لحاظ سے وہ دارالکفر تھا، لیکن چونکہ مسلمانوں کو وہاں اپنے دین پر عمل کرنے کی اجازت تھی، اس لیے وہ ساتھ ساتھ دارالامن بھی تھا۔
خلاصہ کلام یہ ہے کہ کسی ملک کو "دارالحرب" یا "دارالکفر " قرار دینے کیلیے بنیادی اہمیت اس بات کو حاصل ہے کہ اس پر اقتدار غیرمسلموں کا ہو اور وہاں ان ہی کا حکم چلتا ہو، لہذا محض مسلمانوں کو اپنے دینی شعائر پر عمل کرنے کی اجازت دینے سے ایسا ملک دارالاسلام نہیں بنے گا، بلکہ دارالکفر ہی رہے گا، کیونکہ مکمل اقتدار غیرمسلموں کو حاصل ہے، اور وہ جب چاہیں اس اجازت کو واپس لے سکتے ہیں۔
(2) دارالاسلام سے مراد وہ ملک ہے جو مسلمانوں کے قبضے میں ہو، اور اس پر ان کا مکمل تسلط ہو کہ وہاں انہی کے احکام جاری اور نافذ ہوتے ہوں۔
اگرچہ مسلمانوں کے تسلط کا نتیجہ یہ ہونا چاہئیے کہ اس ملک میں تمام احکام اسلامی شریعت کے مطابق جاری ہوں، لیکن اگر مسلمان حکمرانوں کی غفلت اور کوتاہی سے اس میں شریعت کا مکمل نفاذ نہ ہو تب بھی اگر اقتدار مسلمانوں کے ہاتھ میں ہو تو اسے دارالاسلام ہی کہا جائے گا،لہذا کسی اسلامی ملک میں لوگوں کی صحت کو مدنظر رکھتے ہوئے محض انتظامی طور پر مسجد میں نماز کی پابندی لگادینے سے وہ ملک "دارالکفر" نہیں بنے گا۔