سوال: السلام عليكم، مفتی صاحب! اگر کوئی نفلی عبادت (مثلاً: نفلی روزہ وغیرہ) کا ارادہ اچھی نیت سے کرے، لیکن بعد میں (روزہ رکھنے سے پہلے ہی) وسوسہ شامل ہوجائے کہ لوگ بھی میرے بارے میں اچھا محسوس کریں گے تو کیا پھر اس کو روزہ رکھنا چاہیے؟ اسی طرح اگر ایک شخص روزہ اس نیت سے رکھ رہا تھا کہ لوگ اس کے بارے میں اچھا محسوس کریں گے، لیکن پھر وہ توبہ کر کے صحیح نیت سے روزہ رکھنا چاہے تو کیا وہ روزہ رکھ سکتا ہے؟

جواب: واضح رہے کہ دوسروں کو دکھانے کی نیت سے قصداً کوئی عمل کرنا تاکہ لوگ اس کو اچھا سمجھیں اور اس کی شہرت ہو تو یہ ریاکاری اورایک اختیاری چیز ہے، کیونکہ اس میں عمل کا باعث ہی اللہ تعالیٰ کی رضاحاصل کرنے کے بجائے دوسری چیز مقصود ہوتی ہے، اس لیے حدیث شریف میں ریاکاری کو شرک قراردیا گیا ہے۔
البتہ اگر کوئی شخص ایک اچھا عمل اللہ کی رضا کی نیت سے کر رہا ہو، اور اس دوران یا عمل کے بعد اس کو یہ وسوسہ آئے کہ لوگ مجھے دیکھ رہے ہیں اور اچھا سمجھ رہے ہیں، یہ قابلِ مذمت نہیں ہے، کیونکہ یہ غیر اختیاری چیز ہے، اس کی طرف دھیان نہیں دینا چاہیے، شیطان اکثر ریا کے خوف سے نیک اعمال کرنے سے روکتا ہے، اور وسوسہ ڈالتا ہے کہ یہ نیک کام کرو گے تو دِکھاوا ہوجائے گا۔
فضیل بن عیاضؒ فرماتے ہیں کہ لوگوں کے جان لینے یا دیکھ لینے کے خوف سے نیک عمل کو ترک کرنا ریا ہے، اور لوگوں کے لیے کوئی کام کرنا شرک ہے، اور اخلاص یہ ہے کہ اللہ تعالیٰ دونوں سے عافیت میں رکھے۔
حضرت حاجی امداد اللہ صاحب مہاجر مکی ؒ فرماتے ہیں کہ ریا ہمیشہ ریا نہیں رہتی، کوئی اوّل ریا سے کام کرتا ہے، پھر ریا سے عادت ہوجاتی ہے اور پھر عبادت ہوجاتی ہے، اس لیے محض ریا کے خوف سے کوئی نیک عمل نہیں چھوڑنا چاہیے۔