سوال: حضرت ! ایک شخص ڈاکٹر یا وکیل نہیں ہے، مگر وہ ان شعبوں میں کافی مہارت رکھتا ہے اور وہ اپنے آپ کو ڈاکٹر یا وکیل کہلائے اور ان شعبوں کو اپنی ذریعہ آمدن بنائے، تو کیا اس کے لیے اس سے حاصل ہوئی کمائی حلال ہوگی، جب کہ لوگوں کو اس سے فائدہ بھی حاصل ہو رہا ہو؟

جواب: جو شخص باقاعدہ ڈاکٹر یا وکیل نہ ہو٬ اس کیلئے اپنے آپ کو ڈاکٹر یا وکیل کہلانا، غلط بیانی اور دھوکہ دہی ہونے کی وجہ سے جائز نہیں٬ کیونکہ عرف عام میں ڈاکٹر یا وکیل اسے کہا جاتا ہے٬ جس نے معروف طریقے کے مطابق اس شعبے کی تعلیم اور ڈگری حاصل کی ہو٬ نیز مطلوبہ ڈگری حاصل کئے بغیر ان شعبوں میں کام کرنا اور پیسے کمانا حکومتی جائز قانون کی بھی خلاف ورزی ہے٬ جس سے بچنا شرعا ضروری ہے.
تاہم جو شخص اس فیلڈ میں ماہر ہو٬ اور اپنی جائز خدمات (Services) کے عوض طے شدہ فیس وصول کرے٬ تو وہ کمائی فی نفسہ حلال ہوگی٬ اس کمائی کو حرام نہیں کہا جائے گا٬ البتہ اس طریقے سے کام کرنے کی وجہ سے جھوٹ، دھوکہ دہی اور حکومتی قانون کی خلاف ورزی کا گناہ ہوگا۔