سوال: السلام علیکم، مفتی صاحب!
اگر کوئی فیملی ٹریول کر رہی ہو، تو میت کو دفنانے میں ایک دن یا کچھ دنوں تک انتظار کر سکتے ہیں؟ جزاک اللہ

جواب: کسی مسلمان کے انتقال ہوجانے کے بعد سنت یہ ہے کہ تجہیز وتکفین اور تدفین میں جلدی کی جائے، بلا عذر شرعی یا قانونی مجبوری کے تاخیر کرنا، خواہ کسی بھی مقصد کے لیے ہو، مکروہ ہے۔
حدیث شریف میں آتا ہے کہ نبی کریم صلی اللہ علیہ وسلم نے ارشاد فرمایا :جنازہ لے جانے میں جلدی کرو ، اس لئے کہ اگر وہ نیک ہے تو اسے تم بھلائی ہی کی طرف بڑھاو گے اور اگر اس کے برعکس ہے تو وہ ایک برائی ہے، جسے اپنی گردنوں سے اتار کر رکھ دو گے۔
اس حدیث شریف سے معلوم ہوا کہ تدفین میں جلدی کرنا چاہیے، محض میت کے کسی قریبی رشتہ دار کے انتظار یا میت کا چہرہ دیکھنے کے لیے تدفین میں تاخیر کرنا خلاف سنت ہے۔