سوال: محترم مفتی صاحب! السلام علیکم،
میرے پاس DSLR کیمرے ہیں، کیا اس کیمرے کو کرایہ پر دینا جائز ہے؟

جواب: واضح رہے ڈیجیٹل کیمرے سے لی گئی تصویر میں علماء کرام کی آراء مختلف ہیں، بعض علماء کرام ناجائز اور بعض علماء کرام جائز قرار دیتے ہیں، لہذا جو علماء کرام ڈیجیٹل کیمرہ کی تصویر کو ناجائز کہتے ہیں، ان کے نزدیک ڈیجیٹل کیمرہ کرایہ پر دینا ناجائز ہوگا، اور جو علماء کرام جائز کہتے ہیں، ان کے نزدیک تصویر کے جواز کے شرائط کا لحاظ رکھتے ہوئے ڈیجیٹل کیمرہ کرایہ پر دینا، اور اس پر نفع کمانا جائز ہوگا۔
واضح رہے کہ جن علماء کرام کی طرف سے ڈیجیٹل کیمرے کی جس تصویر کی گنجائش دی گئی ہے، اس سے مراد اس چیز کی تصویر ہے، جس کو خارج میں بغیر تصویر کے دیکھنا بھی جائز ہو، اور جس چیز کو خارج میں بغیر تصویر کے دیکھنا جائز نہیں، اس کی تصویر یا ویڈیو بنانا بھی جائز نہیں، جیسے : نامحرم عورتیں، فحش تصاویر وغیرہ، لہذا ڈیجیٹل تصویر کے جواز کے فتویٰ کا تعلق ان علماء کے نزدیک بھی اس چیز کی ڈیجیٹل تصویر سے ہے، جس کو خارج میں دیکھنا جائز ہو۔
ڈیجیٹل تصویر کے جواز کی رائے کے مطابق شرائط کا لحاظ رکھتے ہوئے، ڈیجیٹل کیمرہ کرایہ پر دینا اگرچہ جائز ہے، لیکن بعض علماء کرام کا موقف ناجائز ہونے کا بھی ہے ، لہذا اس کام سے بچنا بہتر ہے۔