سوال: السلام علیکم ورحمة الله وبركاته،
ایزی پیسہ اور جیز کیش وغیرہ اس وقت رقوم کے ارسال کے لیے ایک معروف طریقہ، بلکہ مجبوری بن چکی ہے، اب اس صورت حال میں اپنے اکاؤنٹ میں مناسب مقدار میں رقم بھی رکھنی پڑتی ہے، لیکن مشکل یہ ہے کہ اس رقم پر کمپنی کی طرف سے جو سہولیات ملتی ہیں، وہ سود کے زمرے میں آتی ہیں۔
سوال یہ ہے کہ اگر صارف کی نیت صرف رقم کا ارسال ہو تو کوئی گنجائش مل سکتی ہے؟

جواب: ایزی پیسہ اور جاز کیش اکاؤنٹ کھلوانا فی نفسہ جائز ہے٬ اور اس میں جمع شدہ رقم کی حیثیت قرض کی ہے٬ البتہ اس سے حاصل ہونے والی سہولیات سے فائدہ اٹھانے سے متعلق تفصیل یہ ہے کہ :
1... جس سہولت کو حاصل کرنے کیلئے اکاؤنٹ میں متعین رقم رکھنا مشروط نہ ہو٬ بلکہ اکاؤنٹ کے ذریعے محض کسی بھی طرح رقم استعمال کرنے پر کسٹمر کو کمپنی کی طرف سے کوئی سہولت دی جائے٬ جیسے: کیش بیک وغیرہ ٬ تو اس صورت میں حاصل ہونے والی سہولت سے فائدہ اٹھانا جائز ہے٬ کیونکہ یہ کمپنی کی طرف سے سروس استعمال کرنے پر حط ثمن (قیمت میں کمی) یا انعام ہے.
2... جن سہولیات کو حاصل کرنے کیلئے اکاؤنٹ میں متعین رقم رکھنا مشروط ہو٬ تو اس صورت میں کمپنی کی طرف سے حاصل ہونے والی سہولیات مثلا: فری منٹس٬ فری میسج یا رقم منتقل کرنے کی سہولت وغیرہ استعمال کرنا جائز نہیں ہے٬ کیونکہ ایزی پیسہ اکاؤنٹ میں جمع شدہ رقم کی حیثیت چونکہ قرض کی ہے٬ اور اس پر ملنی والی سہولیات قرض کے ساتھ مشروط ہیں٬ جبکہ قرض دیکر اس پر مشروط نفع حاصل کرنا سود ہونے کی وجہ سے ناجائز اور حرام ہے٬ لہذا اس طرح کی سہولیات (جو اکاؤنٹ میں متعین رقم رکھنے کے ساتھ مشروط ہوں) سے فائدہ اٹھانا جائز نہیں.
(ماخذہ: تبویب فتاوی جامعہ دارالعلوم کراچی٬ ٤١/٢٠٦١ )