سوال: بندہ کے بھائی کا انتقال ہوگیا ہے، 4 بیٹے اور ایک بیٹی ہے مرحوم کے، بھائی اور 3 بہنیں ہیں، اس سلسلے میں انہوں نے اچھی رقم چھوڑی، جس کو ماں اور ان کے بچوں کے حوالے کردیا اور انہوں نے اس کو تقسیم کرلیا۔ کچھ رقم ایسی تھی جو انہوں نے مختلف کمپنیوں سے بطور معاہدہ لی تھی اور وہ رقم ان کی وفات کے کچھ عرصے بعد مجھے دی گئی۔ بندہ ان کا چھوٹا بھائی ہے۔ ایک جگہ انہوں نے مکان بھی بنایا تھا، جس پر کئی رقم ان پر قرض ہے۔ اب جب بچوں کو قرض کا بتایا تو انہوں نے کہا ہمارے والد نے ہمیں کبھی نہیں بتایا تو یہ قرض میں نے اس رقم سے جو میرے پاس تھی ادا کردیا، اور اب اس میں سے مزید کچھ رقم میرے پاس ہے۔ کیا میں اس کو کسی مسجد کے بنانے میں ان کے ایصال ثواب کے لیے دے سکتا ہوں؟ اس سلسلے میں وضاحت فرماکر عنداللہ ماجور ہوں۔
اگر نہیں تو کیا رقم میں ان کے بچوں اور اہلیہ کو دے دوں یا ان کی بیٹی کی شادی قریب ہے، اس پر خرچ کردوں، کیونکہ اگر میں اب یہ رقم ان کو دے دوں گا تو لامحالہ وہ مجھے موردِ الزام ٹھہرائیں گے کہ تمہارے پاس اور رقم بھی ہوگی۔ اور اگر ان کو دی جائے تو وہ بچی کی شادی میں اس چیز کا خیال نہیں رکھیں گے۔ آپ شرعی طریقے پر رہنمائی فرمائیں۔

جواب: مرحوم کی جو رقم آپ کے پاس ہے، وہ ان کے شرعی ورثاء کا حق ہے۔ آپ نے جو قرض اس رقم سے مرحوم کی طرف سے ادا کیا وہ بہت اچھا کیا، باقی جو رقم بچ گئی ہے، اس کے مالک آپ نہیں، ان کے شرعی ورثاء بیوی بچے وغیرہ ہیں، لہٰذا ان کی مرضی کے بغیر وہ رقم آپ کسی مسجد یا ایصالِ ثواب وغیرہ کے لیے نہیں لگاسکتے اور نہ ہی کسی ایک وارث یعنی بیٹی کی شادی وغیرہ میں لگاسکتے ہیں، کیونکہ یہ سب ورثاء کا مشترکہ حق ہے، لہٰذا آپ کو چاہیے کہ کسی بھی حیلہ سے یہ رقم ان سب ورثاء کو بقدر حصہ ضرور پہنچادیں، تاکہ قیامت کے دن کی پوچھ اور سوال سے سبکدوش ہوسکیں۔