سوال: ایک شخص آن لائن چیزیں فروخت کرتا ہے، بیچنے والا اپنے پاس بہت کم یا زیرو فیصد سامان رکھتا ہے، جب کسٹمرز فیس بک یا دراز پر کوئی چیز دیکھ کر اپنا آرڈر بک کرواتا ہے، تو وہ شخص آرڈر لے کر مارکیٹ سے وہ چیز خرید کر اس کسٹمرز کو دے کر اس کی قیمت وصول کر لیتا ہے، تو کیا اس طرح تجارت کرنا درست ہے؟

جواب: واضح رہے کہ جو چیز ملکیت اور قبضہ (Possession) میں نہ ہو٬ اسے آگے فروخت نہیں کرسکتے٬ البتہ اس مرحلہ پر خرید و فروخت کا وعدہ کیا جاسکتا ہے٬ کہ میں آپ کو فلاں چیز فروخت کروں گا٬ پھر ملکیت اور قبضہ حاصل ہونے کے بعد اسے باقاعدہ فروخت کیا جاسکتا ہے۔
مذکورہ صورت میں چونکہ بیچی جانے والی چیز (Product) فروخت کرنے والی کی ملکیت میں نہیں ہوتی٬ بلکہ آرڈر ملنے کے بعد فروخت کرنے والا اسے خرید کر آگے بھیجتا ہے٬ اس لئے آرڈر لینے کے مرحلہ میں حتمی خرید فروخت کا معاملہ کرنا جائز نہیں ہے٬ بلکہ یہ وعدہ کے درجے میں ہو کہ فلاں تاریخ تک آپ کو فلاں چیز فروخت کروں گا٬ پھر جب وہ چیز خرید کر کسٹمر کو روانہ کریں گے٬ اور کسٹمر وصول کرلے٬ تو اس وقت عملی طور پر (تعاطی کے ذریعے) معاملہ مکمل سمجھا جائے گا٬ ایسی صورت میں کسٹمر تک مال پہنچنے سے پہلے راستے کا رسک (Risk) بھی فروخت کرنے والے کا ہوگا.