سوال: السلام علیکم، ایک مسئلے کے بارے میں رہنمائی درکار ہے۔
عام مارکیٹ میں ایک طریقہ کار رائج ہے کہ آپ مارکیٹ میں کوئی دکان وغیرہ کرایہ پر لینا چاہتے ہو تو وہ کچھ رقم بطور ضمانت لیتے ہیں، پھر اسکی دو صورتیں ہوتی ہیں:
ایک یہ کہ دکان چھوڑنے پر واپس کرتے ہیں اور دوسری صورت میں ناقابل واپسی ہوتی ہے،
دونوں صورتوں کی شرعی حیثیت کیا ہے؟
نیز یہ بھی فرمادیں کہ وہ رقم دکان کا مالک اپنے اخراجات، کاروبار یا اکثر اسی پیسوں سے مارکیٹ کی تعمیر کرتے ہیں، اس کی کیا حیثیت ہوگی؟

جواب: دوکان یا مکان وغیرہ کرایہ پر لینے کی صورت میں مالک مکان کا ضمانت کے طور پر کرایہ دار سے ایڈواس رقم لینا جائز ہے٬ یہ رقم ابتداء امانت ہوتی ہے٬ جسے اصولاً مالک مکان کو استعمال کرنے کا حق حاصل نہیں٬ لیکن آجکل عمل اور عرف یہ ہے کہ مالک مکان اس رقم کو استعمال کرتا ہے٬ اور کرایہ دار کی طرف سے دلالۃً اس کی اجازت ہوتی ہے٬ اس لئے وہ رقم بالآخر مالک مکان کے ذمہ قرض بن جاتی ہے٬ اس لئے اس رقم کو وہ اپنے استعمال میں لا سکتا ہے.
واضح رہے کہ اس قرض (ضمانت کی رقم) کی وجہ سے ماہانہ کرایہ میں معروف کرایہ سے کمی کی شرط لگانا جائز نہیں٬ کیونکہ یہ قرض پر نفع لینے کی ایک صورت ہے٬ جسے حدیث مبارکہ میں سود قرار دیا گیا ہے.

جہاں تک اس رقم کی واپسی کا تعلق ہے٬ تو اس میں تفصیل یہ ہے کہ کرایہ داری کا معاملہ ختم ہونے کے وقت اگر کرایہ دار نے جان بوجھ کر یا غفلت اور لاپرواہی کی وجہ سے اس مکان کو کوئی نقصان پہنچایا ہو٬ تو ہونے والے حقیقی نقصان کی تلافی اس ضمانت کی رقم سے کی جاسکتی ہے٬ باقی رقم کرایہ دار کو واپس کرنا شرعا ضروری ہے٬ بلا وجہ شرعی اس رقم کو ضبط کرنا جائز نہیں ہے۔