سوال: مفتی صاحب! اگر کوئی شخص حج فرض ہونے کے باوجود ادا نہ کرے، تو ایسے شخص کو حدیث شریف میں یہودی اور نصرانی سے تشبیہ دی گئی ہے، سوال یہ ہے کہ اس کی وجہ کیا ہے؟

جواب: واضح رہے کہ حج فرض عین ہے اور اسلام کا چوتھا رکن ہے، جو شخص حج کی فرضیت کا انکار کرے گا، وہ کافر ہو جائے گا اور جو شخص حج فرض ہونے کے باوجود ادا نہ کرے گا، تو وہ گنہگار ہوگا۔
اسی وجہ سے حضور صلی اللہ علیہ وسلم کے ارشاد کا مفہوم ہے کہ جس کے پاس زاد و راحلہ (خوراک اور سواری کا خرچ) مہیا ہو گیا (جو اس کو بیت اللہ تک پہنچا سکے)، پھر بھی اس نے حج نہ کیا، تو عجب نہیں کہ وہ یہودی یا نصرانی ہوکر مرے۔
حضرت شاہ ولی اللہ محدث دہلوی رحمہ اللہ نے حجۃ اللہ بالغہ میں اس حدیث کو نقل کرنے کے بعد حج ادا نہ کرنے والے کو یہودی اور نصرانی سے تشبیہ دینے کی وجہ بیان فرمائی ہے کہ حج چھوڑنے والے کو یہود و نصاری کے ساتھ اور نماز چھوڑنے والے کو مشرکین کے ساتھ اس لئے تشبیہ دی گئی ہے کہ یہود و نصاری نماز تو پڑھتے تھے، لیکن حج نہیں کرتے تھے، اور عرب کے مشرکین حج تو کرتے تھے، لیکن نماز نہیں پڑھتے تھے۔