سوال: اس حدیث "اے اللہ! تیری مغفرت میرے گناہوں سے زیادہ وسعت والی ہے" کی صحت کے بارے میں رہنمائی فرمادیں۔

جواب:
سوال میں مذکور حدیث "مستدرک حاکم" اور "شعب الإيمان للبیہقي" میں مذکور ہے، اس حدیث کے راویوں کے بارے میں امام حاکم رحمہ اللّٰہ نے فرمایا ہے: "ان راویوں میں سے کسی ایک پر بھی محدثین نے جرح نہیں کی ہے"، نیز علامہ منذری رحمہ اللّٰہ نے اپنی کتاب "الترغیب والترہیب" میں اس حدیث کو ذکر کرنے کے بعد امام حاکم رحمہ اللّٰہ ہی کے کلام کو ذکر فرمایا ہے، اس سے معلوم ہوتا ہے کہ اس حدیث کی سند میں ضعف نہیں ہے، لہذا آنحضرت صلی اللّٰہ علیہ وسلم کی طرف سے اس صحابی کو تعلیم فرمائے گئے، ان کلمات مغفرت کے ساتھ دعا کرنے سے مغفرت کی زیادہ امید ہے۔
ذیل میں مکمل حدیث سند ومتن اور ترجمہ کے ساتھ ذکر کی جاتی ہے:
1952 حَدَّثَنَا إِسْمَاعِيلُ بْنُ مُحَمَّدِ بْنِ الْفَضْلِ الشَّعْرَانِيُّ ، ثنا جَدِّي ، أَنْبَأَ إِبْرَاهِيمُ بْنُ الْمُنْذِرِ الْحِزَامِيُّ ، ثنا عُبَيْدُ اللَّهِ بْنُ مُحَمَّدِ بْنِ حُنَيْنٍ ، حَدَّثَنِي عُبَيْدُ اللَّهِ بْنُ مُحَمَّدِ بْنِ جَابِرِ بْنِ عَبْدِ اللَّهِ ، عَنْ أَبِيهِ ، عَنْ جَدِّهِ ، قَالَ : جَاءَ رَجُلٌ إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ ، فَقَالَ : وَاذُنُوبَاهُ وَاذُنُوبَاهُ ، فَقَالَ هَذَا الْقَوْلَ مَرَّتَيْنِ أَوْ ثَلَاثًا ، فَقَالَ لَهُ رَسُولُ اللَّهِ صَلَّى اللَّهُ عَلَيْهِ وَسَلَّمَ : "قُلِ اللَّهُمَّ مَغْفِرَتِكَ أَوْسَعُ مِنْ ذُنُوبِي وَرَحْمَتَكَ أَرْجَى عِنْدِي مِنْ عَمَلِي"، فَقَالَهَا ثُمَّ قَالَ : "عُدْ"، فَعَادَ ثُمَّ ، قَالَ : "عُدْ"، فَعَادَ ، فَقَالَ : "قُمْ، فَقَدْ غَفَرَ اللَّهُ لَكَ".

(المستدرك على الصحيحين: أَوَّلُ كِتَابِ الْمَنَاسِكِ/ وَأَمَّا حَدِيثُ رَافِعِ بْنِ خَدِيجٍ حدیث رقم: 1952)
وقال الحاکم: حَدِيثٌ رُوَاتُهُ عَنْ آخِرِهِمْ مَدَنِيُّونَ مِمَّنْ لَا يُعْرَفُ وَاحِدٌ مِنْهُمْ بِجَرْحٍ ، وَلَمْ يُخَرِّجَاهُ
(وکذا أخرجه البيهقي في شعب الإيمان: حديث رقم: 7126)
والحدیث أوردہ المنذری فی "الترغیب" ٢/ ٣١١، وقال: رواه الحاكم وقال رواته مدنيون لا يعرف واحد منهم بجرح
ترجمہ:
حضرت جابر بن عبداللہ رضی اللّٰہ عنہما سے مروی ہے کہ ایک شخص آنحضرت صلی اللّٰہ علیہ وسلم کی خدمت میں حاضر ہوا اور کہنے لگا: ہائے میرے گناہ! ہائے میرے گناہ! اس طرح کے الفاظ اس نے دو یا تین مرتبہ کہے، اس پر آپ صلی اللّٰہ علیہ وسلم نے اسے فرمایا: یہ کلمات کہو: "اللَّهُمَّ مَغْفِرَتِكَ أَوْسَعُ مِنْ ذُنُوبِي وَرَحْمَتَكَ أَرْجَى عِنْدِي مِنْ عَمَلِي" (اے اللہ! تیری مغفرت میرے گناہوں سے زیادہ وسعت والی ہے اور مجھے اپنے عمل سے زیادہ تیری رحمت کی اُمید ہے)، اس شخص نے جب یہ کلمات کہے، تو آپ نے فرمایا: دوبارہ یہ کلمات کہو، اس نے دوبارہ یہ کلمات کہے، پھر آپ نے فرمایا: دوبارہ یہ کلمات کہو، اس نے دوبارہ یہ کلمات کہے، اس کے بعد آپ نے اسے فرمایا: اٹھ جا، اللہ تعالی نے تیری مغفرت کردی ہے۔