سوال: دعائے گنج العرش کا پڑھنا کیسا ہے؟ اور اس کے جو فضائل آئے ہیں کہ حضرت جبرائیل علیہ السلام نے آپ ﷺ کو مسجد نبوی میں اس کی تعلیم دی، کیا یہ درست ہے؟

جواب: واضح رہے کہ کسی بھی دعا کے الفاظ کا سنت سے ثابت ہونا شرط نہيں ہے، بلكہ اتنی بات کافی ہے کہ كہ دعا كے الفاظ شرعاً درست ہوں، لہذا اگر اپنی حاجت کے لئے کوئی دعا مانگی جائے یا کسی بزرگ کی مجرب دعا کو پڑھا جائے تو جائز ہے، بشرطیکہ سنت سمجھ کر نہ پڑھا جائے اور مسنون دعا کی طرح اس کا اہتمام نہ کیا جائے۔

"دعائے گنج العرش" جناب رسول اللہ صلی اللہ علیہ وسلم، صحابہ کرام، تابعین تبع تابعین اور ائمہ کرام میں سے کسی سے ثابت نہیں ہے، بلکہ اس دعا کی تمام فضیلتیں اپنی طرف سے گھڑی ہوئی ہیں، اس دعا کا نام ہی اس کے من گھڑت ہونے پر دلیل ہے، کیونکہ اس کا نام فارسی زبان میں ہے، اگر یہ دعا سنت سے ثابت ہوتی، تو کم از کم اس کا نام تو فارسی زبان میں نہیں ہوتا، لہذا اس دعا اور اس کے فضائل کو جناب رسول اللہ صلی اللہ علیہ وسلم یا صحابہ کرام رضوان اللہ تعالی علیہم اجمعین یا ائمہ کرام رحمھم اللہ کی طرف منسوب کرکے پڑھنا جائز نہیں ہے۔