سوال: میرا حافظہ کمزور ہے، میں فرض نماز ختم ہونے پر امام کی دعا کے دوران دائیں ہاتھ سر پر رکھ کر پہلے درودشریف، پھر گیارہ مرتبہ یا قوی، پھر چودہ مرتبہ رَبِّ اشْرَحْ لِي صَدْرِي وَيَسِّرْ لِي أَمْرِي وَاحْلُلْ عُقْدَةً مِّن لِّسَانِي يَفْقَهُوا قَوْلِي، پھر گیارہ مرتبہ رَبِّ زِدْنِي عِلْمًا، پھر درودشریف پڑھ کر ہاتھ میں پھونکھ مارکر چہرے پر پھیرتا ہوں۔ کیا یہ دین میں اضافہ (بدعت) تو نہیں ہے؟

جواب: واضح رہے کہ جائز مقاصد کے حصول کے لیے وہ وظائف جو بزرگوں کے مجربات ہوتے ہیں، اگر وہ مجربات شریعت کی تعلیمات کے خلاف نہ ہوں، تو انہیں بطور علاج پڑھنے میں کوئی مضائقہ نہیں ہے، البتہ ان وظائف کو فرض واجب سمجھنا درست نہیں ہے۔
سوال میں ذکر کردہ "وظیفہ برائے تقویت حافظہ" بھی ایک مجرب عمل ہے، قرآنی تعلیمات کے خلاف نہیں ہے، لہذا اسے پڑھنا مفید ہے۔
نیز گناہوں سے مکمل اجتناب اور ہر ایسے کام سے پرہیز جو تعلیم میں یک سوئی کو ختم کرے، اس سے بھی حافظے کو تقویت ملتی ہے، لہذا وظیفہ کے ساتھ ساتھ ان باتوں کا خیال رکھنا مفید ہے۔