سوال: اس دعا کی تصدیق فرمادیں کہ حضور ﷺ نماز میں دوسجدوں کے درمیان یہ دعا« اللهم اغفر لي وارحمني وعافني واهدني وارزقني» پڑھتے تھے۔

جواب: سوال میں ذکر کردہ روایت ’’صحیح‘‘ہے ،اس کو بیان کیا جاسکتا ہے۔اس روایت کا ترجمہ ،تخریج اور اسنادی حیثیت مندرجہ ذیل ہے۔
ترجمہ:حضرت عبداللہ بن عباس رضی اللہ عنہما فرماتے ہیں کہ نبی اکرم صلی اللہ علیہ وسلم دونوں سجدوں کے درمیان «اَللّٰهُمَّ اغْفِرْ لِي وَارْحَمْنِي وَعَافِنِي وَاهْدِنِي وَارْزُقْنِي» پڑھتے تھے۔“یعنی اے اللہ! مجھے بخش دے، مجھ پر رحم فرما، مجھے عافیت دے، مجھے ہدایت دے اور مجھے رزق دے‘‘۔(سنن أبی داؤد ،حدیث نمبر:850) (1)
تخریج الحدیث:
۱۔اس حدیث کو امام ابو داؤد (م 275 ھ)نے’’ سنن أبی داؤد:(2/138)، رقم الحدیث : 850،ط: دار الرسالة العالمية) میں ذکر کیا ہے۔
۲۔امام ابن ماجہ(م 273ھ)نے’’سنن ابن ماجہ(1/290)،رقم الحدیث : 898 ،ط: دار إحياء الكتب العربية)میں لفظ’’ اَللّٰهُمَّ ‘‘ کے اضافے کے بغیر ذکر کیا ہے۔
۳۔امام ترمذی (م 279ھ)نے’’سنن الترمذی‘‘(2/76)،رقم الحدیث: 284،ط: شركة مصطفى البابي الحلبي ) میں ذکر کیا ہے۔
۴۔امام احمد بن حنبل (م241 ھ) نے’’مسند احمد‘‘ (5/73)،رقم الحدیث: 2895 ،ط:مؤسسة الرسالة)میں ذکر کیا ہے،البتہ لفظ’’ اَللّٰهُمَّ ‘‘ کے اضافے کے بغیراور ’’صلاۃ اللیل‘‘ یعنی تہجد کی نماز کے سجدوں میں پڑھنے کا ذکر ہے۔
۵۔امام بزار(م292 ھ)نے ’’مسندبزار‘‘(11/319)،رقم الحدیث: 5128،ط:مكتبة العلوم وا لحكم) میں لفظ’’ اَللّٰهُمَّ ‘‘ کے اضافے کے بغیر ذکر کیا ہے۔
6۔امام طبرانى(م 360ھ)نے’’المعجم الکبیر‘‘(12/25)،رقم الحدیث: 12363،ط:مكتبة ابن تيمية) میں ذکر کیا ہے۔
۷۔امام دارقطنی(م 385ھ)نے’’الأفراد‘‘(170) ،رقم الحدیث : 36 )میں ذکرکیا ہے۔
8۔امام حاکم(م 405 ھ)نے ’’مستدرک‘‘(1/393)،رقم الحدیث: 964 ،ط:دارلکتب العلمية) میں ذکر کیا ہے۔
9۔امام بیہقی (م 458ھ)نے’’الدعوات الکبیر‘‘(1/163)،رقم الحدیث : 98،ط: غراس للنشرو التوزیع)میں ذکر کیا ہے۔
مذکورہ روایت اسنادی حیثیت:
امام ترمذی (م 279ھ) نے اس حدیث کے بارے میں فرمایا:یہ حدیث غریب ہے اور بعض محدثین کرام نے اس روایت کوكامل أبی العلاء سے مرسلاًنقل کیا ہے۔
امام حاکم(م 405 ھ)نے ادس روایت کے بارے میں فرمایا:یہ حدیث ’’صحیح الاسناد‘‘ ہے ،امام بخاری اور امام مسلم نے ذکر نہیں کیا ہے ۔امام ذہبی (م 748ھ) نے امام حاکم(م 405 ھ) کی تائیدکرتے ہوئے اس روایت کو ’’صحیح‘‘قراردیا ہے۔(2)
یہ روایت حضرت عبداللہ بن عباس کے علاوہ حذیفۃ بن الیمان،علی بن ابی طالب ، ام سلمہ ہند بنت امیہ، بريدة بن الحصيب الأسلمی ،امام مکحول بن ابی مسلم اور امام عطاء بن ابی رباح سے بھی الفاظ کے کچھ فرق کے ساتھ سے مروی ہے۔