سوال: مفتی صاحب! رات کی نماز شروع کرتے وقت کن الفاظ میں دعا کرنی چاہیے؟

جواب: حضرت عائشہ صدیقہ رضی اللہ عنہا فرماتی ہیں کہ رسول اللہ صلی الله عليه وسلم رات کی نماز ان الفاظ سے شروع فرماتے تھے:
(1) اَللّٰهُمَّ رَبَّ جِبْرِيلَ، ‏‏‏‏‏‏وَمِيكَائِيلَ، ‏‏‏‏‏‏وَإِسْرَافِيلَ، ‏‏‏‏‏‏فَاطِرَ السَّمَوَاتِ وَالْأَرْضِ عَالِمَ الْغَيْبِ وَالشَّهَادَةِ أَنْتَ تَحْكُمُ بَيْنَ عِبَادِكَ فِيمَا كَانُوا فِيهِ يَخْتَلِفُونَ، ‏‏‏‏‏‏اهْدِنِي لِمَا اخْتُلِفَ فِيهِ مِنَ الْحَقِّ بِإِذْنِكَ إِنَّكَ أَنْتَ تَهْدِي مَنْ تَشَاءُ إِلَى صِرَاطٍ مُسْتَقِيمٍ.
ترجمہ: اے اللہ! اے جبرائیل، میکائیل اور اسرافیل کے پروردگار! آسمانوں اور زمین کو ایجاد کرنے والے، پوشیدہ اور اعلانیہ کا علم رکھنے والے، جن باتوں میں (یہ تیرے بندے) اختلاف کررہے ہیں، تو ہی ان کا فیصلہ کرے گا، اور حق کے بارے میں جو اختلاف (دنیا میں) ہورہا ہے، اُس میں اپنے فضل سے میری رہنمائی فرما، بے شک تو ہی جس کو چاہتا ہے، سیدھے راستہ پر چلاتا ہے۔
(السنن لابي داؤد، باب ما يستفتح به الصلاة من الدعاء، رقم الحديث: 767)
نیز یہ دعا پڑھنا بھی ثابت ہے:
(2) حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم جب رات کو نماز شروع فرماتے، تو
دس بار اَللهُ اَكبَر ( اللہ سب سے بڑا ہے) کہتے، دس بار اَلحَمدُ لِلّٰهِ ( تمام تعریفیں اللہ کے لیے ہیں) کہتے، دس بار سُبْحَانَ اللَّهِ ( میں اللہ کی پاکی بیان کرتا ہوں) کہتے، اور دس بار اَستَغفِرُ اللهَ (میں اللہ سے مغفرت مانگتا ہوں) کہتے، پھر یہ دعا فرماتے: اَللّٰهُمَّ اغْفِرْ لِي وَاهْدِنِي وَارْزُقْنِي وَعَافِنِي ( اے اللہ ! میری مغفرت فرما، اور مجھے ہدایت پر ثابت قدم رکھ، اور مجھے رزق عطا فرما، اور مجھے عافیت دے) اَعُوْذُ بِاللّٰہ مِنْ ضِيقِ الْمُقَامِ يَوْمَ الْقِيَامَةِ ( میں اللہ کی پناہ مانگتا ہوں، قیامت کے دن جگہ کی تنگی سے)
(السنن لابن ماجة، بَابُ مَا جَاءَ فِي الدُّعَاءِ إِذَا قَامَ الرَّجُلُ مِنَ اللَّيْلِ، رقم الحديث: 1356)