سوال: میں نے دکان کے لئے فریزر خریدا تھا، تاکہ اس میں بوتل، جوس اور آئس کریم وغیرہ رکھ کر ٹھنڈا کرسکوں، اور اس کو خریدے ہوئے ایک سال ہوگیا ہے، اور اس فریزر کی قیمت بھی نصاب سے زیادہ ہے، سوال یہ ہے کہ کیا اس پر زکوۃ واجب ہوگی یا نہیں؟

جواب: جو اشیاء تجارت کی غرض سے فروخت کرنے کے لئے نہ خریدی جائیں، بلکہ دکان یا کارخانہ میں استعمال کے لئے خریدی جائیں، تو ان پر زکوۃ واجب نہیں ہوتی، لہذا صورتِ مسئولہ میں چونکہ آپ نے فریزر تجارت کی غرض سے نہیں خریدا، بلکہ اس میں دکان کی اشیاء بوتل، جوس اور آئس کریم وغیرہ کو ٹھنڈا رکھنے کے لئے خریدا ہے، لہذا اس فریزر پر زکوٰۃ واجب نہیں ہوگی۔