سوال: مفتی صاحب ! سورۃ التوبہ آیت نمبر: 36 کی تفسیر بیان کیجئے اور یہ بھی بتائیے کہ وہ چار ماہ کونسے ہیں جن کا اس آیت میں ذکر ہوا ہے؟

جواب: ارشاد باری تعالیٰ ہے: اِنَّ عِدَّةَ الشُّهُوْرِ عِنْدَ اللّـٰهِ اثْنَا عَشَرَ شَهْرًا فِىْ كِتَابِ اللّـٰهِ يَوْمَ خَلَقَ السَّمَاوَاتِ وَالْاَرْضَ مِنْـهَآ اَرْبَعَةٌ حُرُمٌ ۚ ذٰلِكَ الـدِّيْنُ الْقَيِّـمُ ۚ فَلَا تَظْلِمُوْا فِيْـهِنَّ اَنْفُسَكُمْ ۚ وَقَاتِلُوا الْمُشْرِكِيْنَ كَآفَّةً كَمَا يُقَاتِلُوْنَكُمْ كَآفَّةً ۚ وَاعْلَمُوٓا اَنَّ اللّـٰهَ مَعَ الْمُتَّقِيْنَ(سورۃ التوبۃ، آیت نمبر: 36)
ترجمہ: "بے شک اللہ کے ہاں مہینوں کی گنتی بارہ مہینے ہیں اللہ کی کتاب میں جس دن سے اللہ نے زمین اور آسمان پیدا کیے، ان میں سے چار عزت والے ہیں، یہی سیدھا دین ہے، سو ان میں اپنے اوپر ظلم نہ کرو، اور تم سب مشرکوں سے لڑو جیسے وہ سب تم سے لڑتے ہیں، اور جان لو کہ اللہ پرہیزگاروں کے ساتھ ہے"۔
مذکورہ آیت سے ثابت ہوتا ہے کہ مہینوں کی تعداد، ان کی ترتیب اور ان کے خاص احکام انسانوں کی اصطلاح نہیں ہے، بلکہ جس دن آسمان و زمین کی تخلیق ہوئی، اسی دن اللہ تعالیٰ نے ان کی تعداد، ترتیب اور احکام مقرر فرما دیئے تھے، ان میں ردوبدل کرنا یا اپنی طرف سے کوئی کمی بیشی کرنا جائز نہیں ہے۔
اسی طرح سال کے بارہ مہینوں میں سے چار مہینے ( رجب، شوال، ذو القعدہ اور ذوالحجہ ) حرمت والے ہیں، یعنی یہ مہینے متبرک اور واجب الاحترام ہیں، ان میں عبادت کا ثواب زیادہ ملتا ہے، پہلے زمانے میں ان مہینوں میں قتل و قتال بھی منع تھا۔