عنوان: ایک ہی مجلس میں تین طلاقیں دینے سے تینوں طلاقیں واقع ہو جاتی ہیں

سوال: میری بہن کا نکاح 2007 میں ہوا، شادی کے ایک سال بعد بہنوئی نے ایک طلاق کا نوٹس دیا، اور دوران عدت ہی رجوع کر لیا گیا لیکن ایک بار پھر گھریلو نا چاقیوں کی وجہ سے 22 اگست 2026 کو بہنوئی نے بذریعہ نوٹس ایک ساتھ تین طلاقیں دے دیں، ان دونوں کی چار بیٹیاں ہیں، بچوں کے لیے دونوں فریق پھر سے آباد ہونا چاہتے ہیں، اگر صورت نکلتی ہے تو مدد فرمائیں۔ آپ کی رہنمائی کا بہت مشکور رہوں گا۔

جواب: واضح رہے کہ شریعتِ مطہرہ میں نکاح ایک مضبوط عہد اور مقدس رشتہ ہے، لہٰذا نکاح کے بعد میاں بیوی کو حتی الامکان باہمی نباہ اور رشتے کو برقرار رکھنے کی کوشش کرنی چاہیے، لیکن اگر باہمی نباہ کی کوئی صورت باقی نہ رہے تو شریعت نے شوہر کو طلاق کا اختیار دیا ہے۔ تاہم شریعت نے طلاق دینے کا جائز طریقہ بھی بتلایا ہے، جس کی رعایت کرنا ضروری ہے، چنانچہ طلاق دینے کا شرعی طریقہ یہ ہے کہ شوہر اپنی بیوی کو ایسے طہر (پاکی) میں ایک طلاق دے، جس میں اس نے بیوی سے ازدواجی تعلق قائم نہ کیا ہو، پھراسے اختیار ہے کہ عدت کے دوران رجوع کرلے یا عدت گزرنے دے، لیکن اگر کوئی شخص اس شرعی طریقے کی خلاف ورزی کرتے ہوئے ایک ہی مجلس میں اپنی بیوی کو تین طلاقیں دے دے تو اس کا یہ عمل ناجائز اور گناہ ہے، البتہ جمہور فقہاء بالخصوص ائمہ اربعہ کے نزدیک ایسی صورت میں تینوں طلاقیں واقع ہوجاتی ہیں اور عورت اپنے شوہر پر حرمتِ مغلّظہ کے ساتھ حرام ہوجاتی ہے۔ اس مسئلے پر قرآن و سنت اور آثارِ صحابہ رضی اللہ عنہم سے متعدد دلائل موجود ہیں، جن میں مختصراً چند کو ذکر کیا جاتا ہے:
قرآن کریم سے دلیل:
اللہ تعالیٰ سورۃ البقرۃ میں ارشاد فرماتے ہیں: الطَّلَاقُ مَرَّتَانِ فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ
ترجمہ: طلاق (زیادہ سے زیادہ) دو بار ہونی چاہیے، اس کے بعد ( شوہر کے لیے دو ہی راستے ہیں) یا تو قاعدے کے مطابق ( بیوی کو) روک رکھے (یعنی طلاق سے رجوع کرلے) یا خوش اسلوبی سے چھوڑ دے (یعنی رجوع کے بغیر عدت گزر جانے دے) (سورۃ البقرۃ: 229)
اس آیتِ مبارکہ میں اللہ تعالیٰ نے طلاقِ رجعی کی تعداد دو مرتبہ بیان فرمائی ہے، پھر اس کے بعد اگلی آیت میں تیسری طلاق کا حکم بیان فرمایا ہے۔ چنانچہ ارشادِ باری تعالیٰ ہے: فَإِنْ طَلَّقَهَا فَلَا تَحِلُّ لَهُ مِنْ بَعْدُ حَتَّىٰ تَنْكِحَ زَوْجًا غَيْرَهُ ترجمہ: پھر اگر شوہر( تیسری) طلاق دیدے تو وہ ( مطلقہ عورت) اس کے لیے اس وقت تک حلال نہیں ہوگی جب تک وہ کسی اور شوہر سے نکاح نہ کرے (سورۃ البقرۃ: 230)
ان آیاتِ مبارکہ میں تین طلاقوں کے احکام مذکور ہیں، لیکن کہیں اس بات کی صراحت نہیں کہ تین طلاقیں ایک مجلس میں دینے سے واقع نہیں ہوں گی، لہٰذا جمہور فقہاء کے نزدیک ایک مجلس میں دی گئی تین طلاقیں واقع ہو جاتی ہیں۔
نیز شریعت میں ایسی متعدد مثالیں موجود ہیں کہ کسی عمل کے ناجائز اور گناہ ہونے کے باوجود اس کا شرعی حکم ثابت ہوجاتا ہے۔ مثلاً: اگر کوئی شخص اپنی بیوی سے حالتِ حیض میں جماع کرے تو یہ عمل ناجائز اور گناہ ہے، کیونکہ اللہ تعالیٰ کا ارشاد ہے: وَيَسْأَلُونَكَ عَنِ الْمَحِيضِ قُلْ هُوَ أَذًى فَاعْتَزِلُوا النِّسَاءَ فِي الْمَحِيضِ۔ ترجمہ:"اور لوگ آپ سے حیض کے بارے میں پوچھتے ہیں، آپ کہہ دیجیے کہ وہ گندگی ہے لہذا حیض کی حالت میں عورتوں سے الگ رہو"۔(سورۃ البقرۃ: 222)
لیکن اگر کوئی شخص اس ممانعت کے باوجود جماع کرلے اور اس کے نتیجے میں حمل ٹھہر جائے تو بچہ اپنے باپ سے ہی ثابت النسب ہوگا، لہٰذا اس صورت میں یہ نہیں کہا جائے گا کہ چونکہ شوہر نے ہم بستری حالت حیض میں کی ہے، اس لیے یہ بچہ شوہر کا نہیں ہے۔
اس سے معلوم ہوا کہ کسی عمل کے ناجائز اور حرام ہونے سے یہ بات ثابت نہیں ہوتی کہ اس عمل کے نتیجے میں ہونے والا حکم بھی ثابت نہیں ہوگا، لہٰذا محض اس بنیاد پر کہ ایک مجلس میں تین طلاقیں دینا ناجائز اور گناہ ہے، ان کے واقع نہ ہونے کا حکم لگانا درست نہیں ہے۔
حدیثِ مبارکہ سے دلیل:
ایک مجلس میں تین طلاقیں دینے کی مذمت سے متعلق حضرت محمود بن لبید رضی اللہ عنہ سے روایت ہے کہ رسول اللہ ﷺ کو اس شخص کے متعلق بتایا گیا جس نے اپنی بیوی کو اکٹھی تین طلاقیں دے دیں تو آپ ﷺ غصے کی حالت میں کھڑے ہوئے اور فرمایا: أَيُلْعَبُ بِكِتَابِ اللَّهِ وَأَنَا بَيْنَ أَظْهُرِكُمْ؟ ترجمہ: "کیا اللہ کی کتاب سے کھیلا جارہا ہے حالانکہ ابھی میں تمھارے درمیان موجود ہوں!"۔ (سنن النسائی، حدیث نمبر: 3401)
اس حدیثِ مبارکہ سے معلوم ہوتا ہے کہ ایک ہی مجلس میں تین طلاقیں دینا خلافِ شرع عمل ہے، جس پر رسول اللہ ﷺ نے سخت ناراضی کا اظہار تو فرمایا، لیکن یہ نہیں فرمایا کہ یہ طلاقیں واقع بھی نہیں ہوں گی، اگر فرض کریں کہ ایک مجلس میں تین طلاقیں دینے سے تینوں طلاقیں واقع نہ ہوتی تو حضور ﷺ کیوں غصہ کا اظہار فرماتے، حالانکہ غصہ کا اظہار فرمانے کی وجہ یہی ہے کہ تین طلاقیں ایک ساتھ دینے سے واقع ہو جاتی ہیں اور اس کے بعد بچے ساری زندگی در بدر کی ٹھوکریں کھاتے ہیں۔
صحابی رسول کا اثر اور فتوی:
اسی طرح حضرت ابن عباس رضی اللہ عنہما سے ایک شخص نے عرض کیا کہ میں نے اپنی بیوی کو (100) سو طلاقیں دے دی ہیں، آپ کی اس بارے میں کیا رائے ہے؟ تو حضرت ابن عباس رضی اللہ عنہما نے فرمایا کہ عورت پر تین طلاقیں واقع ہو چکی ہیں اور باقی ستانوے طلاقوں سے تو نے اللہ کی آیات سے استہزاء کیا ہے۔ (موطأ امام مالک، باب ماجآء البتة، حدیث نمبر:1581)
لہذا مذکورہ بالا قرآنی آیت، حدیثِ مبارکہ اور حضرت ابن عباس رضی اللہ عنہ کے فتویٰ کی روشنی میں جمہور فقہاء بالخصوص ائمہ اربعہ کے نزدیک ایک ہی مجلس میں دی گئی تین طلاقیں تین ہی واقع ہوتی ہیں، اگرچہ اس طرح طلاق دینا ناجائز اور گناہ ہے۔
لہٰذا آپ کی پوچھی گئی صورت میں چونکہ شوہر نے اپنی بیوی کو ایک ہی مجلس میں تین طلاقیں دی ہیں تو جمہور فقہاء کے نزدیک تینوں طلاقیں واقع ہوچکی ہیں اور عورت اپنے شوہر پر حرمتِ مغلظہ کے ساتھ حرام ہوگئی ہے، اب دونوں کا میاں بیوی کی حیثیت سے ساتھ رہنا جائز نہیں ہے، البتہ اگر عورت پہلے شوہر کی عدت گزار کر کسی اور مرد سے نکاح کرے، اور اس سے ازدواجی تعلقات قائم کرے، پھر وہ اسے طلاق دیدے یا اس کا انتقال ہو جائے، پھر عورت عدت گزار کر پہلے شوہر سے گوہوں کی موجودگی میں دوبارہ نکاح کرے تو ایسا کرنا جائز ہے۔