سوال: مفتی صاحب ! کیا رجب والی دعا اَللّٰھمَّ باَرِکْ لَنَا فِيْ رَجَبَ وَشَعْبَانَ وَبَلِّغْنَا رَمَضَان سنت سے ثابت ہے؟ بعض لوگ کہتے ہیں کہ یہ حدیث صحیح نہیں ہے۔ براہ کرم وضاحت فرمادیں۔

جواب: سوال میں ذکر کردہ روایت کواگرچہ محدثین کرام رحمہم اللہ نے ضعیف قرار دیا ہے، لیکن فضائلِ اعمال کے سلسلے میں ایسی روایت پر عمل کیا جاسکتا ہے،نیز روایت میں ذکرکرددہ دعا کے الفاظ معنی اور مفہوم کے لحاظ سے درست ہیں ، اور سلف کا اس پر عمل بھی ہے، لہذا اس دعا کے پڑھنے میں کوئی حرج نہیں ہے۔سوال میں ذکرکرددہ دعاکی روایت کا ترجمہ ،تخریج اور اسنادی حیثیت مندرجہ ذیل ہے
ترجمہ:حضرت انس رضی اللہ عنہ سے روایت ہے کہ جب’’ رجب‘‘ کا مہینہ شروع ہوتا ،تو آپ ﷺ یوں دعا فرماتے تھے: أَللَّهُمَّ بَارِكْ لَنَا فِیْ رَجَبَ وَشَعْبَانَ وَبَلِّغْنَا رَمَضَانَ یعنی اے اللہ! ہمارے لیے ماہِ رجب اور شعبان میں برکت عطا فرما ئیے اور ہمیں رمضان تک پہنچايے۔( ’’المعجم الأوسط‘‘حديث نمبر:3939،ط:دارالحرمین)(۱)
تخریج الحدیث:
۱۔ اما م طبرانی (م 360ھ) نے اس روایت کو ’’المعجم الأوسط‘‘(4/189، رقم الحدیث:3939،ط:دارالحرمین )،الدعاء(284)،رقم الحدیث: 911،ط: دارالکتب العلمیة )میں ذکر کیا ہے۔
۲۔امام ابن السُّنّي، (م280ھ)نے’’ عمل اليوم والليلة‘‘(610،رقم الحدیث: 659،ط:دارالقبلة) میں ذکر کیا ہے۔
3۔حافظ ابن ابی الدنیا (م 281 ھ)’’فضائل رمضان‘‘(23)،رقم الحديث:1،ط:دارالسلف) میں ذکر کیا ہے۔
4۔ امام عبداللہ بن احمد بن حنبل (م 290 ھ )نے’’زوائد مسند أحمد ‘‘(4/180، رقم الحدیث: 2346،ط:مؤسسة الرسالة) میں ذکر کیا ہے۔
5۔امام بزار(م 292 ھ)نے ’’مسندبزار‘‘(13/117، رقم الحدیث: 6496، ط: مكتبة العلوم والحكم) میں ذکر کیا ہے۔
6۔حافظ ابونعیم الاصفہانی(م 430 ھ)نے’’ حلية الأولیاء‘‘ (6 /269، ط: السعادة) میں ذکر کیا ہے۔
7۔امام بیھقی(م 458ھ)نے’’شعب الإيمان‘‘(3/ 375، رقم الحدیث: 3815،ط:دارالکتب العلمیة) اور’’ فضائل الأقات" (ص: 98، رقم الحدیث: 14،ط: مکتبة المنارة)،’’الدعوات الکبیر‘‘(2/142)،رقم الحدیث: 529،ط:غراس للنشر) میں ذکر کیا ہے۔
مذکورہ روایت کی اسنادی حیثیت :
واضح رہے کہ مذکورہ بالاحدیث پر بعض محدثین کرام نے کلام کیا ہے۔
علامہ ہیثمی(م 807ھ)فرماتے ہیں : اس روایت کو نزار نے نقل کیا ہے اور اس کی سند میں ’’زائدہ بن ابی الرقاد ‘‘روای کو امام بخاری(م 256ھ) نے ’’منکر الحدیث‘‘کہا ہے اور محدثین کرام کی ایک جماعت نے مجہول قراردیا ہے۔ اسی طرح ایک اور جگہ لکھتے ہیں کہ اس روایت کو امام بزار اور امام طبرانی(م360 ھ)نےالمعجم الاوسط میں روایت کیا ہے اور اس میں ’’زائدہ بن ابی الرقاد ‘‘روای کے بارے میں کلام کیا گیا ہے اور ان کی توثیق بھی کی گئی ہے۔(۲)
علامہ مناوی ؒ(م1031 ھ)نے فیض القدیر میں لکھا ہے کہ آپ ﷺ سے رجب کی فضیلت کے متعلق صرف یہ بات ثابت ہے کہ جب’’ رجب‘‘ کا مہینہ شروع ہوتا ،تو آپ ﷺ یوں دعا فرماتے تھے’’ أَللَّهُمَّ بَارِكْ لَنَا فِیْ رَجَبَ وَشَعْبَانَ وَبَلِّغْنَا رَمَضَانَ ‘‘ ، اور اس کے علاوہ کوئی بات ثابت نہیں ہے۔(۳)
شیخ أحمد بن عبد الرحمن الساعاتي (م 1378ھ) نے لکھا ہے کہ علامہ سیوطی (م ھ)نے ’’الجامع الصغیر ‘‘میں اس کے ضعف کی طرف اشارہ کیا ہے لیکن اس کے دوسرے طرق بھی ہیںجن سے اس کو تقویت ملتی ہے۔(۴)
علامہ طاہر پٹنی (م 986ھ) نے لکھا ہے کہ یہ حدیث ضعیف ہے لیکن فضائل کےباب میں ضعیف حدیث پر عمل جائز ہے۔(۵)
اور علامہ ابن حجر ہیتمی ؒ (م 974 ھ) نے ’’ماہ رجب ‘‘ کے شروع ہونے پر اس دعا کے پڑھنے کو سنت(۶)اور حافظ ابن رجب حنبلیؒ (م 795ھ)نے مستحب قراردیا ہے۔(7)
ا س تفصیل سے معلوم ہو اکہ مذکورہ روایت ضعیف ہے،لہذا اس روایت کو ضعف کی طرف اشارہ کرکے ہی بیان کرنا چاہیے،البتہ چونکہ فضائل سے متعلق ہے اور دعا کے الفاظ بھی معنی و مفہوم کے اعتبار سے درست ہیں ،اس لیے اس روایت پر عمل کرتے ہوئے رجب کے چاند داخل ہونے پر مذکورہ دعا پڑھنے میں کوئی حرج نہیں ہے۔