سوال:
مفتی صاحب! حج تمتع، افراد اور حج قران میں کیا فرق ہے؟ وضاحت فرمادیں۔
جواب: حج کی تین اقسام ہیں:
۱) حج قران:
اشہر حج میں ایک ہی احرام سے عمرہ اور حج اس طرح ادا کرنا کہ دونوں کے درمیان احرام اتار کر حلال نہ ہو، یعنی عمرہ ادا کرنے کے بعد حلق یا قصر نہ کیا جائے اور حالت احرام میں رہتے ہوئے ایام حج کا انتظار کیا جائے اور پھر اسی احرام سے حج ادا کرکے حلال ہو جائے، اس حج میں دم شکر (حج کی قربانی) واجب ہوتا ہے۔ حج قران، حج تمتع اور حج افراد سے افضل ہے۔
۲)حج تمتع:
اشہر حج میں عمرہ اور حج اس طرح ادا کرنا کہ دونوں کے درمیان احرام اتار کر حلال ہوجائے، یعنی عمرہ ادا کرنے کے بعد حلق یا قصر کرکے حلال ہو جائے اور احرام اتار دے اور پھر ایام حج آنے پر دوبارہ حج کی نیت سے احرام باندھے، حج تمتع میں بھی دم شکر (حج کی قربانی) واجب ہوتا ہے۔ حج تمتع حج افراد سے افضل ہے۔
۳) حج افراد:
اشہر حج میں صرف حج کی ادائیگی کے لیے احرام باندھنا اور عمرہ ادا نہ کرنا "حج افراد" کہلاتا ہے، حج افراد میں دم شکر (حج کی قربانی) واجب نہیں ہوتا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الھدایة: (279/1، ط: رحمانیة)
القران افضل من التمتع و الافراد، و صفتہ القران ان یھل بالعمرۃ و الحج معا من المیقات، و یقول عقیب الصلاۃ "اللھم انی ارید الحج و العمرۃ، فیسرھما لی و تقبلھما منی۔
و فيها ایضاً: (283/1، ط: رحمانیة)
التمتع افضل من الافراد، و صفتہ ان یبتدی من المیقات فی اشھر الحج، فیحرم بالعمرۃ ویدخل مکۃ، فیطوف لھا، و یسعی لھا، و یحلق او قیصر و قد حل من عمرتہ و یقطع التلبیۃ اذا ابتدأ بالطواف، ویقیم حلالا، فاذا کان یوم الترویۃ احرم بالحج من المسجد و فعل ما یفعلہ الحاج المفرد۔
رد المحتار: (515/2، ط: دارالفکر)
(قوله لأنه مفرد) تعليل لما استفيد من التخيير بقوله إن شاء والذبح له أفضل، ويجب على القارن والمتمتع
واللہ تعالٰی اعلم بالصواب
دارالافتاء الاخلاص،کراچی