سوال: سوال یہ ہے کہ کیا 27 رجب کی شب کو جاگنا، نوافل کا اہتمام کرنا اور روزہ رکھنا بدعت ہے؟

جواب: رجب کا مہینہ چار حرمت والے مہینوں میں سے ہے اور ان مہینوں میں نیک اعمال کرنا دوسرے مہینوں کی بنسبت زیادہ افضل ہے اور اس کا ثواب بھی زیادہ ہے ، لیکن اس مہینے کی ستائیس تاریخ کو شب معراج منانا ، دن کو روزہ اور رات کو قیام کرنا، محافل نعت اور مختلف دینی مجالس منعقد کرنا اورمساجد میں چراغاں وغیرہ کرنا اور یہ خیال کرنا کہ ستائیس رجب کو حضور اکرم ﷺ کا سفر معراج ہوا تھا تو واضح رہے کہ اس رات کی قرآن و حدیث سے کسی قسم کی کوئی فضیلت ثابت نہیں ہے اور نہ ہی روزہ اور نوافل کی کوئی خاص فضیلت ثابت ہے،محدثینِ کرام نے اپنی کتابوں میں اس کی تردید کی ہے ، چنانچہ حافظ ابن حَجر عسقلانیؒ نے اپنی کتاب ’’تبیین العجب مما ورد فی فضل رجب ‘‘میں لکھا ہے:"رجب کی فضیلت میں، اِس کے روزوں کی فضیلت میں، اِس کے کسی دِن میں خاص طور پر کوئی روزہ رکھنے کی فضیلت میں اور اِس کی کسی خاص رات میں قیام کرنے کے بارے میں کوئی ايسی صحیح حدیث نہيں ملتی ہے جو قابل حُجت ہو۔"
علامہ شوکانی رحمہ اللہ نے فرماتے ہیں :’’خاص طور پر ماہ رجب کے متعلق کوئی صحیح ،حسن یا کم درجے کی ضعیف سنت وارد نہیں، بلکہ اس سلسلے میں وارد تمام روایات یا تو من گھڑت اورجھوٹی ہیں یا شدید ضعیف ہیں ۔ ‘‘
علامہ ابن قیمؒ نے فرمایا ہے :’’رجب کے روزے اور اس کی کچھ راتوں میں قیام کے متعلق جتنی بھی احادیث بیان کی جاتی ہیں، وہ تمام جھوٹ اور بہتان ہیں ۔"
اسی طرح پہلے زمانے میں رجب کے پہلے جمعہ کو ’’ صلاۃ الرغائب"نامی نماز پڑھی جاتی تھی، جیسے کہ آج کل رجب کی ستائیسویں رات کو مخصوص قسم کی نمازیں پڑھی جاتی ہیں ، ان نوافل کا کوئی ثبوت نہیں ہے۔
علامہ نوویؒ نے اس نماز کے بارے میں لکھا ہے کہ" اللہ تعالى اس كے گھڑنے اور ايجاد كرنے والے كو تباہ و برباد كرے، كيونكہ يہ منكرات اور ان بدعات ميں سے ہیں جو گمراہى اور جہالت ہيں اور اس ميں كئى ظاہر منكرات پائى جاتى ہيں۔۔۔۔اس كى قباحت، بطلان اور اس پر عمل كرنے والے كى گمراہى كے دلائل شمار نہيں كيے جا سكتے ہیں۔
علامہ ابن رجب حنبلی ؒ نے اس نماز کے بارے میں لکھا ہے کہ جمہور علماء کے نزدیک یہ نماز بدعت ہے اورمتقدمین تو اس نماز کو جانتے نہ تھےکیونکہ یہ چارصدیوں کے بعد ظاہر ہوئی ہے۔
فقہائے کرام نے بھی اس پر سخت نکیر فرمائی ہے اور اسے بدعت قرار دیا ہے۔
علامہ شامی نے لکھا ہے کہ اس مسئلہ ميں علامہ نور الدين المقدسىؒ كى " ردع الراغب عن صلاۃ الرغائب " كے نام سے ايك بہترين تصنيف ہے، جس ميں انہوں نے مذاہب اربعہ كے متقدمين اور متاخرين علماء كرام كےكلام كو جمع كيا ہے۔
خلاصہ کلام :
ستائیس رجب کے خصوصی نوافل اور روزوں کا اہتمام کہیں سےثابت نہیں ہے، نہ کبھی حضور اکرم ﷺنے کیا، نہ صحابہ کرام رضی اللہ تعالیٰ عنہم نے اور نہ ہی تابعین عظام رحہم اللہ نے کیا، لہذا اس مہینے میں تخصیص کے ساتھ کسی عبادت کو ضروری سمجھنا درست نہیں ہے، ہاں تخصیص اور التزام کے بغیر جس قدر ہوسکے، اس پورے مہینے میں عبادت کا زیادہ اہتمام کرنا چاہیے۔