سوال: السلام علیکم و رحمۃ اللہ و برکاتہ
مفتی صاحب ! زکوۃ کی تاریخ کے حوالے سے ایک کنفیوژن ہے۔
اگر سال کے دوران نصاب سے مال کم ہو جائے، مگر مکمل ختم نہ ہو، تو تاریخ تبدیل نہیں ہوتی، جس تاریخ کو زکوۃ کی ادائیگی ہے، اس دن واپس صاحب نصاب ہوگیا تو کیا
زکوۃ ادا کرنی ہوگی؟ یا مال نصاب سے کم ہوتے ہی تاریخ ختم ہو جائے گی اور صاحب نصاب ہونے پہ دوبارہ تاریخ طے کرنی ہوگی؟ یا مال بالکل ختم ہونے پہ تاریخ تبدیل ہوگی؟
براہ کرم وضاحت فرمادیں کہ ان میں سے کون سی صورت ٹھیک ہے؟
جزاک اللہ خیرا

جواب: واضح رہے کہ زکوٰۃ کی ادائیگی واجب ہونے کے لیے نصابِ زکوٰۃ پر سال گزرنا لازمی ہے، البتہ سال گزرنے کا یہ مطلب نہیں ہے کہ مال کے ہر ہر حصے پر مکمل سال گزرے، کیونکہ مال سارا سال آتا جاتا رہتا ہے، لہذا سال گزرنے کا اصول یہ ہے کہ جب کوئی شخص نصاب زکوٰۃ کا مالک ہوا ہے، اس دن ( سال کے پہلے دن) اور سال مکمل ہونے کے آخری دن وہ شخص صاحب نصاب ہو، دوران سال اگر مال بڑھ جائے یا کم ہوجائے ( یعنی نصاب سے کم ہو گیا ہو بالکل ختم نہ ہوا ہو ) اس سے کوئی فرق نہیں پڑتا اور اس اضافے پر الگ سے سال کا گزرنا ضروری نہیں ہے، خواہ یہ اضافہ سال مکمل ہونے سے دو دن پہلے ہوا ہو۔
ہاں! اگر مال بالکل ہی ختم ہو جائے، کہ ایک روپیہ بھی نہ بچے، تو ایسی صورت میں سال کا حساب ختم ہوجائے گا، پھر جب مال آجائے اور اتنا آجائے کہ وہ نصاب زکوٰۃ کو پہنچتا ہو، تو اس پر از سر نو سال گزر ے گا، پھر زکوٰۃ ادا کی جائے گی۔