سوال: مفتی صاحب ! والد کا انتقال ہوا، ورثاء میں چار بیٹے، تین بیٹیاں اور بیوہ ہے، ایک بیٹے نے جائیداد کے چار حصے کر کے چاروں بیٹوں کو دے دیے، مرحوم کی بیوہ اور بیٹیوں کو کچھ نہیں دیا، اب ایک بیٹا اپنے زائد حصے میں سے بیوہ، تینوں بیٹیوں اور تینوں بیٹوں کو ان کا حق دینا چاہتا ہے، اس کی تقسیم کی ترتیب کیا ہوگی؟

جواب: صورتِ مسئولہ میں بیٹوں نے والد کی میراث کی غیر شرعی تقسیم کی ہے، لہٰذا تمام بیٹوں کو چاہیے کہ وہ مکمل ترکہ ازسرِ نو شرعی طریقہ سے تقسیم کریں، جس کا طریقہ یہ ہے کہ کل ترکہ سے حقوقِ متقدمہ یعنی مرحوم کی تجہیز و تکفین کا خرچہ نکالنے، مرحوم کے ذمہ کوئی قرض ہو تو اس کو باقی ترکہ سے ادا کرنے اور اگر مرحوم نے کوئی جائز وصیت کی ہو تو اس کو باقی ترکہ کے ایک تہائی سے پورا کرنے کے بعد باقی پورے ترکہ (خواہ منقولی ہو یا غیر منقولی ) کو اٹھاسی (88) حصوں میں تقسیم کیا جائے گا، جس میں سے بیوہ کو گیارہ (11)، چار بیٹوں میں سے ہر ایک بیٹے کو چودہ (14) اور تین بیٹیوں میں سے ہر ایک بیٹی کو سات (7) حصے ملیں گے۔
اگر فیصد کے اعتبار سے تقسیم کریں تو
بیوہ کو %12.5 فیصد
ہر ایک بیٹے کو % 15.90 فیصد
ہر ایک بیٹی کو % 7.95 فیصد ملے گا۔

جو لڑکا والدہ اور بہنوں کو حصہ دینا چاہتا ہے، اس کو چاہیے کہ اوپر ذکر کردہ طریقۂ تقسیم کے مطابق جتنا حصہ اس کے پاس زیادہ بن رہا ہے، وہ تمام حصہ والدہ، بہنوں اور بھائیوں میں شرعی تناسب سے تقسیم کردے۔
اور باقی تینوں لڑکوں کو بھی چاہیے کہ وہ بھی زائد حصہ والدہ، بہنوں اور بھائیوں میں شرعی تناسب سے تقسیم کر دیں، ورنہ آخرت میں سخت عذاب ہوگا۔
احادیثِ مبارکہ میں اس پر بڑی وعیدیں وارد ہوئی ہیں، حضرت سعید بن زید رضی اللہ تعالیٰ عنہ فرماتے ہیں کہ رسول اللہ صلی اللہ علیہ وسلم نے فرمایا: جو شخص ( کسی کی ) بالشت بھر زمین بھی ظلماً لے گا، قیامت کے دن ساتوں زمینوں میں سے اتنی ہی زمین اس کے گلے میں طوق کے طور پر ڈالی جائے گی۔
دوسری حدیثِ مبارکہ میں ہے، حضرت انس رضی اللہ تعالیٰ عنہ فرماتے ہیں کہ رسول اللہ صلی اللہ علیہ وسلم نے فرمایا: جو شخص اپنے وارث کی میراث کاٹے گا، (یعنی اس کا حصہ نہیں دے گا) تو اللہ تعالیٰ قیامت کے دن اس کی جنت کی میراث کاٹ لے گا۔