سوال: مفتی صاحب ! میں صاحب نصاب ہوں، مجھے کچھ ریٹائرمنٹ کے بعد ملنے والی رقم کے بقایاجات دسمبر کے مہینے میں ملے ہیں، کیا مجھے اس سال ان پیسوں کی زکوۃ بھی نکالنی ہوگی؟
میرا دوسرا سوال یہ ہےکہ کیا بھائی اور بہن کو زکوۃ دے سکتے ہیں اور کیا ان کو بتانا ضروری ہے کہ یہ زکوۃ کی رقم ہے؟

جواب: واضح رہے کہ زکوۃ واجب ہونے کیلئے ہر ہر روپے پر سال گزرنا شرط نہیں ہے٬ بلکہ پہلی دفعہ جب آپ صاحب نصاب بنے٬ سال گزرنے کے بعد اگلے سال اسی تاریخ کو اگر آپ صاحب نصاب ہوں٬ تو آپ پر زکوۃ فرض ہے٬ اب ہر سال یہی تاریخ آپ کی زکوۃ کی تاریخ ہے٬ اس وقت جتنے اموال زکوۃ (سونا٬ چاندی٬ نقدی اور سامان تجارت) آپ کی ملکیت میں ہوں٬ ان کے حساب سے آپ زکوۃ کی ادائیگی کریں گے٬ دوران سال مال کے کم یا زیادہ ہونے سے کوئی فرق نہیں پڑے گا۔
مذکورہ بالا تمہید کے بعد آپ کے سوال کا جواب یہ ہے کہ جب آپ اپنی زکوۃ کی تاریخ کو صاحب نصاب ہیں٬ تو اس وقت جو بھی نقدی آپ کی ملکیت میں ہو٬ دیگر اموال زکوۃ کے ساتھ اس پر بھی زکوۃ واجب ہوگی٬ چاہے وہ نقدی ایک دن پہلے آپ کی ملکیت میں آئی ہو٬ لہذا دسمبر میں ملنے والی جتنی رقم زکوۃ کی تاریخ کو آپ کی ملکیت میں باقی ہے٬ اس پر زکوۃ واجب ہوگی۔

2- بھائی اور بہن اگر مستحق زکوۃ ہوں٬ تو انہیں زکوۃ دینا جائز ہے٬ بشرطیکہ ان کا کھانا پینا علیحدہ ہو، نیز مستحق زکوۃ کو زکوۃ دیتے وقت اسے زکوۃ کا بتانا ضروری نہیں ہے٬ بلکہ بتائے بغیر بھی انہیں کوئی رقم وغیرہ
زکوۃ کی نیت سے دے سکتے ہیں۔