سوال: السلام علیکم، ایک عالم کی پانچ بیٹیاں ہیں، جب تک وہ والد صاحب کے ساتھ رہ رہا تھا تو والد صاحب اس کا تمام خرچہ برداشت کررہے تھے، لیکن اب اس عالم کا ایک مسجد میں امامت کا تقرر ہو گیا ہے، اب وہ والد صاحب سے الگ ہو گیا ہے، مسجد کی تنخواہ صرف دس ہزار روپے ہے، الگ ہونے کے بعد والد صاحب سے جتنا تعاون ہو سکتا ہے، وہ ہر مہینے کرتے ہیں، ان کل پیسوں کو ملا کر بھی مہینہ بھر اخراجات پورے نہیں ہوتے، جس کی وجہ سے ہر ماہ تھوڑی پریشانی بھی ہوتی ہے، ہر ماہ مزید پیسے ادھار لینا پڑتا ہے۔
اب یہ پو چھنا ہے کہ یہ امام زکوة اور صدقةالفطر کے پیسے لے سکتا ہے یا نہیں، جبکہ ان کے والد امیر آدمی ہیں؟

جواب: واضح رہے کہ بالغ اولاد اور باپ کی ملکیت الگ الگ شمار ہوتی ہے، اس لیے باپ کے صاحب نصاب ہونے سے بالغ بچے صاحب نصاب شمار نہیں ہوں گے ، لہذا صورت مسئولہ میں اگر امام صاحب صاحبِ نصاب اور سید نہ ہوں، تو ان کے لیے زکوۃ اور صدقۃ الفطر لینا جائز ہے۔
نوٹ: امام صاحب کو امامت کی تنخواہ اور اجرت میں زکوة دینا صحیح نہیں ہے، البتہ امام مذکور اگر مقروض اور مستحق زکوة ہیں، تو بغیر کسی معاوضہ کے الگ سے ان کو زکوة دی جاسکتی ہے۔