سوال: مفتی صاحب ! اگر دو پلاٹ رہائش کی نیت سے خریدے جائیں، اور ان میں سے ایک کو فروخت کرکے دوسرے پلاٹ کو تعمیر کرنے کی نیت ہو، یا دونوں کو فروخت کر کے کوئی اور رہائش کے لیے مکان لینے کی نیت ہو، تو ایسی صورت میں ان دونوں پلاٹوں پر زکوۃ کا کیا حکم ہوگا؟

جواب: واضح رہے کہ جو بھی پلاٹ فروخت کرنے کی نیت سے خریدا جائے، وہ بہرصورت مالِ تجارت میں شمار ہوتا ہے اور یہی تجارت کی حقیقت ہے کہ کسی مال کو فروخت کرنے کی نیت سے خریدا جائے، پھر چاہے اس سے رہائشی مقصد حاصل کیا جائے یا کاروباری، لہذا صورت مسئولہ میں جس پلاٹ کو فروخت کرنے کی نیت سے خریدا گیا ہے، اس پر زکوٰۃ واجب ہوگی۔