سوال: مفتی صاحب! ہماری موبائل مارکیٹ میں یہ عام بات ہے کہ جب کسٹمرز موبائل واپس لاتا ہے، تو 20 سے 30 فیصد کٹوتی کرتے ہیں، تو کیا یہ جائز ہے؟

جواب: واضح رہے کہ شریعت میں "اقالہ" فروخت کیے گئے مال کو خریدار اور دکاندار دونوں کی رضامندی کے ساتھ پہلی قیمت پر واپس کرنے کا نام ہے، لہذا حدیث شریف میں ایسے دکاندار کے لیے فضیلت بیان فرمائی گئی ہے کہ جو شخص کسی گاہک سے اپنا بیچا ہوا مال پہلی قیمت پر واپس لے لے، تو اللہ تعالیٰ قیامت کے دن اس کی لغزشوں سے درگزر فرمائیں گے۔
لیکن اگر دکاندار اپنے بیچے ہوئے مال کو پہلی قیمت میں واپس لینے پر راضی نہ ہو، تو اس پر جبر نہیں کیا جا سکتا، البتہ اگر دکاندار پہلی قیمت میں کٹوتی کرنا ہی چاہتا ہے، تو دونوں فریقین کو چاہیے کہ وہ اس معاملے کو "اقالہ" کا عنوان نہ دیں، بلکہ دکاندار خریدار سے کہے کہ پہلے والا معاملہ ختم ہوگیا ہے، اب یہ ایک نیا معاملہ ہے، اس میں مَیں آپ سے یہ چیز اتنی قیمت پر خریدوں گا، سابقہ قیمت میں سے کٹوتی کا اس معاملے میں ہرگز ذکر نہ کیا جائے، تو ایسی صورت میں یہ ایک نیا معاملہ ہوگا، دونوں فریقین بھاؤ تاؤ کے بعد جس قیمت پر راضی ہو جائیں، اسی پر معاملے کو پکا کر دیا جائے، تو ایسا کرنا شرعاً جائز ہے۔