سوال: السلام علیکم و رحمة الله و بركاته، مفتی صاحب ! امہات المؤمنين اور رسول الله صلى الله عليه وسلم کی بیٹی حضرت فاطمہ رضی اللہ عنہما کے پردہ کے بارے میں کچھ بتادیں۔
جزاکم الله خيرا

جواب: حضرت فاطمہ، ازواج مطہرات و صحابیات رضی اللہ عنھن کے پردہ سے متعلق چند روایات ذکر کی جاتی ہیں، جس سے بخوبی اندازہ لگایا جاسکتا ہےکہ ان پاکیزہ ہستیوں کے نزدیک عورت کے پردے کی کیا اہمیت ہے۔
حدثنا محمد بن الحسين الكوفي، قال: نا مالك بن إسماعيل، قال: نا قيس، عن عبد الله بن عمران، عن علي بن زيد، عن سعيد بن المسيب، عن علي رضي الله عنه أنه كان عند رسول الله صلى الله عليه وسلم، فقال: أي شيء خير للمرأة؟ فسكتوا، فلما رجعت قلت لفاطمة: أي شيء خير للنساء؟ قالت: ألا يراهن الرجال، فذكرت ذلك للنبي صلى الله عليه وسلم فقال: «إنما فاطمة بضعة مني» رضي الله عنها وهذا الحديث لا نعلم له إسنادا عن علي رضي الله عنه إلا هذا الإسناد.
(البزار فی مسندہ :159/2،(526)،ط:دارالعلوم والحکم)
ترجمہ:
حضرت علی رضی اللہ عنہ سے روایت ہے کہ وہ رسول اللہ ﷺ کے پاس حاضر تھے، رسول اللہ ﷺ نے دریافت فرمایا: عورت کے لیے کون سی بات سب سے بہتر ہے؟
اس پر صحابہ رضوان اللہ علیہم اجمعین خاموش ہوگئے (اور کسی نے جواب نہیں دیا)حضرت علی کہتے ہیں کہ میں نے واپس آکر حضرت فاطمہ (رضی اللہ عنھا )سے دریافت کیا کہ عورتوں کےلئے سب سے بہتر کیا بات ہے؟
حضرت فاطمہ رضی اللہ عنہا نے فرمایا: نہ وہ مردوں کو دیکھیں اور نہ مرد ان کو دیکھیں، تو میں نے جواب رسول اللہ ﷺ سے ذکر کیا، تو آپ ﷺ نے فرمایا: فاطمہ (رضی اللہ عنھا ) میری لختِ جگر ہے۔

حضرت فاطمہ رضی اللہ عنہا نے ایک دفعہ اسماء بنت عمیس رضی اللہ عنہا سے کہا کہ مجھے حیا آتی ہے کہ جب میرا انتقال ہو، تو لوگ مردوں کے تخت پر لٹا کر اور ایک کپڑا اوڑھا کر مجھے کندھے پر اٹھا لیں۔اس لیے اندیشہ ہے کہ کپڑے کے اوپر سے میرا جسم ظاہر ہو، تو حضرت اسماء رضی اللہ عنہا نے کہا:
جگرِ گوشہِ رسولﷺ ! کیا میں تمہیں ایسی چیز نہ دکھاؤں، جو میں نے ’’ حبشہ ‘‘ میں دیکھی تھی؟
حضرت فاطمہ رضی اللہ عنہا نے کہا ، کیوں نہیں ضرور۔ حضرت اسماء رضی اللہ عنہا نے کھجور کی تازہ ٹہنیاں منگوائیں ، کمان کی شکل میں ان کو موڑ موڑ کر رکھا، اور ان کے اوپر کپڑا ڈال دیا، حضرت فاطمہ رضی اللہ عنہا نے فرمایا : یہ تو بڑی اچھی چیز ہے ، اس سے مرد و عورت کے جنازہ میں امتیاز ہو جائے گا اور عورت کا جسم بھی چھپ جائے گا۔ دیکھو اسماء ! جب میرا انتقال ہو، تو تم اور علی میرے غسل میں شریک ہوں، کوئی اور میرے قریب نہ آئے، اور میری چارپائی پر اسی طرح چھڑیاں رکھ دینا۔
جب حضرت فاطمہ رضی اللہ عنہا کا انتقال ہوا تو حضرت اسماء رضی اللہ عنہا نے دلہن کے ڈولے کی طرح کی ایک پردہ پوش چادر چارپائی تیار کی، اور کہا: فاطمہ نے مجھے اس کی وصیت کی تھی۔
ان روایات سے اندازہ لگایا جا سکتا ہے کہ حضرت فاطمہ رضی اللہ عنھا پردہ کا کتنا اہتمام فرماتی تھیں، یہی وجہ تھی کہ آپﷺ نے حضرت فاطمہ رضی اللہ عنھا کی پاکدامنی پر جنت کی خوشخبری سناتے ہوئے ارشاد فرمایا: فاطمہ (رضی اللہ عنھا ) نے اپنی عصمت اور پاکدامنی کی ایسی حفاظت کی کہ اللہ تعالی نے اس کی پاکدامنی کی وجہ سے اسے اور اس کی اولاد کو جنت میں داخل فرمادیا۔
اور ایک روایت میں ہے کہ بے شک فاطمہ (رضی اللہ عنھا )نے اپنی عصمت اور پاکدامنی کی حفاظت کی، تو اللہ تعالی نے اس کی اولاد پر جہنم کی آگ حرام کردی ہے۔
وأخرج عبد الرزاق، وعبد بن حميد، وأبو داود، وابن المنذر، وابن أبي حاتم، وابن مردويه عن أم سلمة قالت:
لما نزلت هذه الآية يدنين عليهن من جلابيبهن خرج نساء الأنصار كأن رؤوسهن الغربان من السكينة، وعليهن أكسية سود يلبسنها
(="Arabic">فتح القدیر: 352/4، ط: دارابن کثیر)
ترجمہ:
حضرت ام سلمہ رضی اللہ عنہا فرماتی ہیں: جب قرآن کریم کی یہ آیت نازل ہوئی، تو انصار کی خواتین اپنے گھروں سے اس طرح نکلیں کہ گویا ان کے سر اس طرح بے حرکت تھے، جیسے ان کے سروں پر پرندے بیٹھے ہوں، اور ان کے اوپر کالا کپڑا تھا، جس کو وہ پہنی ہوئی تھیں"۔
عن عائشة، قالت: «كان الركبان يمرون بنا ونحن مع رسول الله صلى الله
عليه وسلم محرمات، فإذا حاذوا بنا سدلت إحدانا جلبابها من رأسها على وجهها فإذا جاوزونا كشفناه»

(سنن ابی داود ، کتاب الحج ، باب فی المحرمۃ تغطی وجھھا ، برقم : 1833 167/2،ط:المکتبۃ العصریۃ)
ترجمہ:
حضرت عائشہ رضی اللہ تعالیٰ عنہا روایت فرماتی ہیں: ہم رسول اللہ ﷺ کے ساتھ سفرِ حج میں حالتِ احرام میں تھیں، جب ہمارے پاس سے کوئی سوار گزرتا، تو ہم اپنی چادروں کو اپنے سروں سے لٹکا کر چہرے کے سامنے کرلیتیں اور جب لوگ گزر جاتے تو ہم چہرے کھول لیتیں۔
حدثنا عبد الرحمن بن سلام، حدثنا حجاج بن محمد، عن فرج بن فضالة، عن عبد الخبير بن ثابت بن قيس بن شماس، عن أبيه، عن جده، قال: جاءت امرأة إلى النبي صلى الله عليه وسلم يقال لها أم خلاد وهي منتقبة، تسأل عن ابنها، وهو مقتول، فقال لها بعض أصحاب النبي صلى الله عليه وسلم: جئت تسألين عن ابنك وأنت منتقبة؟ فقالت: إن أرزأ ابني فلن أرزأ حيائي۔۔۔۔ ۔
(سنن ابی داود ، کتاب الجہاد ، باب قتال الروم ۔۔ ،2488، 5/3،ط:المکتبۃ العصریۃ)
ترجمہ:
حضرت قیس بن شماس سے روایت ہے کہ رسول اللہ ﷺ کی خدمت میں ایک عورت حاضر ہوئی، اس کا نام امّ خلاد تھا اور اس کے چہرے پر نقاب پڑا ہوا تھا، یہ عورت اپنے بیٹے کے بارے میں دریافت کر رہی تھی، جو جنگ میں شہید ہو گیا تھا، اصحاب رسول ﷺ میں سے کسی نے آپ کو نقاب میں دیکھ کر کہا: اس وقت بھی آپ نے نِقاب ڈال رکھا ہے، آپ نے جواباً فرمایا : میں نے بیٹاضرور کھویا ہے، حیا نہیں کھوئی۔