سوال: مفتی صاحب! ہم نے سنا ہے کہ سحری اور افطاری کی مشہور دعائیں صحیح نہیں ہیں، براہ کرم صحیح دعائیں بتادیں۔

جواب: واضح رہے کہ نیت دل کے ارادے کو کہتے ہیں، زبان سے الفاظ ادا کرنا ضروری نہیں ہے، لہذا اگر کوئی شخص دل سے ارادہ کرلے کہ کل رمضان کا روزہ رکھوں گا، تو بھی درست ہوجائے گا، البتہ زبان سے نیت کا اظہار مستحب ہے، سوال میں ذکر کردہ الفاظ ’’نویت بصوم غدًا من شھر رمضان‘‘ کسی بھی حدیث سے ثابت نہیں ہیں۔
افطار کی دعا
حضور اکرم صلی اللہ علیہ وسلم سے افطار کے وقت پڑھی جانے والی دو دعائیں احادیث کی کتابوں میں وارد ہیں :
۱۔ “اللَهُمَّ لك صُمْتُ، وعلى رِزْقِكَ أفْطَرْتُ” ۔
(سنن أبی داؤد،حدیث نمبر:2358، 306/2،ط:المکتبۃ العصریۃ)
۲۔ "ذَهَبَ الظَّمَأُ، وَابْتَلَّتِ الْعُرُوقُ، وَثَبَتَ الْأَجْرُ إِنْ شَاءَ اللہ"
(سنن أبی داؤد،حدیث نمبر:2357، 306/2،ط:المکتبۃ العصریۃ)
“اللَهُمَّ لك صُمْتُ، وعلى رِزْقِكَ أفْطَرْتُ” والی دعا افطار کرنے سے پہلے افطار شروع کرتے وقت پڑھی جائے گی، اس دعا میں الفاظ اگرچہ ماضی کے ہیں، لیکن ایسے موقعوں پر فعل ماضی کا استعمال معروف ہے اور دوسری دعا"ذَهَبَ الظَّمَأُ، وَابْتَلَّتِ الْعُرُوقُ، وَثَبَتَ الْأَجْرُ إِنْ شَاءَ اللہ" افطاری کے بعد پڑھی جائے گی۔
نوٹ: واضح رہے کہ افطار کی یہ دعا عوام کی زبانوں پر ان الفاظ کے اضافے کے ساتھ مشہور ہے، ’’اللهم لك صمت وبك آمنت وعليك توكلت وعلى رزقك أفطرت‘‘. حالانکہ دعا میں: ’’وبك آمنت وعليك توكلت‘‘. کےالفاظ ثابت نہیں ہیں، صرف یہ الفاظ ثابت ہیں: ’’ اللهم لك صمت وعلى رزقك أفطرت‘‘.، لہذا جو الفاظ ثابت ہیں، اسی کو پڑھا جائے۔