سوال: السلام علیکم، مفتی صاحب! زکوٰۃ کی ادائیگی کے لئے 3 طرح کے مستحق موجود ہیں، برائے مہربانی رہنمائی فرمادیں کہ ان تینوں میں سے کس کو زکوٰۃ دینا افضل ہوگا؟
1) سگا بھائی جس کے پاس اتنی رقم نہیں یا سونا چاندی ملا کر بھی 52.5 تولہ چاندی کی مقدار کو پہنچے۔ مگر ان کا روزگار رکشہ چلانا ہے، جو ان کی اپنی ملکیت ہے اور جس گھر میں وہ رہتے ہیں، اس کے ایک فلور کا کرایہ بھی آتا ہے، ٹوٹل 6 فیملی ممبر ہیں۔
2) ایک بیوہ جو سسرال کی طرف سے رشتہ دار ہیں، ان کا بیٹا نوکری کرتا ہے، تقریباً 18 سے 20 ہزار کی آمدن ہے، اور وہ خود آن لائن کپڑے اور چادریں وغیرہ بیچ کر گزارہ کرتی ہیں۔ کرایہ کا گھر ہے، ٹوٹل 3 فیملی ممبر ہیں، مختصر سامان زندگی ہے اور کوئی سونا چاندی نہیں۔
3) ایک خاتون جو سسرال کی طرف سے رشتہ دار ہیں۔ انکا شوہر بیمار ہے اور کچھ نہیں کماتا،گھر کرایہ کا ہے، 7 فیملی ممبر ہیں، بھائی بین انکا ماہانہ خرچہ مل جل کر اٹھاتے ہیں، بہت مختصر سامان زندگی ہے، اور کوئی سونا چاندی نہیں۔
رہنمائی فرمادیں کہ ان میں سے کس کو زکوۃ دی جائے؟

جواب: صورت مسئولہ میں وہ خاتون جنکا شوہر بیمار ہے، تین وجوہ سے زکوۃ کی زیادہ مستحق ہیں۔
(1) ان کی آمدنی کا کوئی مستقل ذریعہ نہیں ہے۔
(2) ان کو زکوۃ دینے میں صلہ رحمی ہے۔
(3) سب سے زیادہ محتاج بظاہر یہی معلوم ہوتی ہیں۔