سوال: مفتی صاحب! گھر میں دو بچے تراویح پڑھا رہے ہوں، 17 رمضان کو ایک بچہ بیمار ہو جاتا ہے تو دوسرا بچہ آخری پارے کی سورتیں پڑھ کر تراویح پڑھاتا ہے، تین دن کے بعد دوسرا بچہ جو بیمار تھا،وہ ٹھیک ہو جاتا ہے تو کیا قرآن مجید ختم کرنا ضروری ہے یا چھوٹی سورتیں تراویح میں پڑھانے سے کوئی گناہ تو نہیں ہے؟

جواب: واضح رہے کہ تراویح پڑھنا سنت مؤکدہ ہے اور تراویح میں قرآن کریم ختم کرنا بھی سنت ہے، لہذا کسی معقول عذر کے بغیر، مختصر تراویح پڑھنے سے تراویح تو اپنی جگہ پر درست ہوجائے گی، اور تراویح پڑھنے کی سنت بھی ادا ہوجائے گی، لیکن تراویح میں ختم قرآن کی سنت اور فضیلت سے محرومی ہوگی، اس لئے اس ماہ مبارک میں تھوڑی سی مشقت برداشت کرکے تراویح میں مکمل قرآن کریم پڑھنا گھاٹے کا سودا نہیں ہے، بلکہ بہت بڑے اجر و ثواب اور اللہ رب العزت کی رحمتوں کو سمیٹنے کا ذریعہ ہے، اس لئے حتی الامکان اس کا مکمل اہتمام کرنا چاہئے۔