سوال: مفتی صاحب! دل میں بہت زیادہ نور پیدا کرنے کا وظیفہ اور اس کے پڑھنے کا طریقہ بتادیں۔

جواب: حضرت ابو ھریرہ رضی اللّٰہ عنہ سے روایت ہے کہ نبی کریم صلی اللّٰہ علیہ وسلم نے ارشاد فرمایا: جب بندہ کوئی گناہ کرتا ہے، تو اس کے دل پر ایک سیاہ نکتہ لگ جاتا ہے، پھر اگر وہ اس گناہ کو چھوڑ دے، استغفار اور توبہ کر لے تو اس کا دل صاف شفاف ہو جاتا ہے، لیکن اگر وہ توبہ واستغفار نہ کرے اور دوبارہ اس گناہ کا ارتکاب کرے، تو اس کے دل کی سیاہی میں مزید اضافہ ہو جاتا ہے (جو کہ گناہوں کی کثرت کی وجہ سے بڑھتے بڑھتے) یہاں تک پہنچ جاتی ہے کہ وہ سیاہی پورے دل پر چھا جاتی ہے، چنانچہ یہی وہ زنگ ہے جس کے بارے میں اللہ تعالیٰ نے ارشاد فرمایا ہے: "كَلا بَلْ رَانَ عَلَى قُلُوبِهِم مَا كَانُوا يَكْسِبُون"
(ہرگز نہیں ! بلکہ جو عمل یہ کرتے رہے ہیں اس نے ان کے دلوں پر زنگ چڑھا دیا ہے)۔
(صحیح ابن حبان: رقم الحدیث: 930 باب الأدعية.وأخرجه في رقم الحدیث: 2787 باب صلاة الجمعة)
مذکورہ بالا حدیث سے معلوم ہوتا ہے کہ گناہ انسان کے دل کو تاریک بلکہ زنگ آلود کر دیتے ہیں، لہذا دل میں نور تب پیدا ہو سکتا ہے، جب شریعت کے تمام احکامات کی پابندی اور گناہوں سے مکمل اجتناب کیا جائے، اس کے ساتھ ساتھ قرآن کریم کی تلاوت، ذکر الٰہی، درود شریف کی کثرت اور تہجد کی نماز کو نورانی دل بنانے میں خاص دخل ہے، دل میں نور پیدا کرنے کا یہی وظیفہ ہے جو اوپر بیان ہوا، اس وظیفے کو جتنا زیادہ اہتمام سے کیا جائے گا، دل میں نور دن بدن بڑھتا چلا جائے گا۔
نیز اس کے ساتھ ساتھ اگر درج ذیل دعا کا بھی اہتمام کیا جائے، تو فائدہ دو چند ہو جائے گا۔
جب فجر کی نماز پڑھنے کے لیے جائیں، تو یہ دعا پڑھیں:
اللَّهُمَّ اجْعَلْ فِي قَلْبِي نُورًاً وَفِي بَصَرِي نُورًا وَفِي سَمْعِي نُورًا وَعَنْ يَمِينِي نُورًا وَعَنْ يَسَارِي نُورًا وَفَوْقِي نُورًا وَتَحْتِي نُورًا وَأَمَامِي نُورًا وَخَلْفِي نُورًا وَعَظِّمْ لِي نُورًا.
ترجمہ:
اے اللہ ! میرے دل میں نور کر دے، میری آنکھوں میں نور کر دے، میری سماعت میں نور کردے، میرے دائیں نور کر دے، میرے بائیں نور کر دے، میرے اوپر نور کر دے، میرے نیچے نور کر دے، میرے سامنے نور کر دے، میرے پیچھے نور کر دے اور میرے لئے نور کو بڑھا دے۔
(صحيح مسلم، باب الدعاء فی صلاۃ اللیل و قیامہ، رقم الحديث 1788)