سوال: رسول اللہ صلی الله عليه وسلم نے فرمایا: جب تم سے کسی کا کھانا آجائے اور اس کے پیروں میں چپل ہو تو اس کو نکال دے، اس لیے کہ یہ پیروں کے لیے راحت ہے اور سنت بھی ہے۔ (معجم ابی یعلیٰ،296، عن انس بن مالک رضی اللہ عنہ) مفتی صاحب! اس حدیث کی تصدیق فرمادیں۔

جواب: سوال میں ذکر کردہ مذکورہ روایت پر اگرچہ بعض محدثین کرام ؒ نے کلام کیا ہے، اور ضعیف قرار دیا ہے لیکن اس روایت کے دوسرے شواہد موجود ہیں، جس کی بناء پر اس روایت کو تقویت مل جاتی ہے،نیز روایت کا تعلق فضائل سے ہے اور فضائل کے باب اس قسم کی روایات قابلِ قبول ہیں، لہذا اس روایت کو بیان کرنے گنجائش ہے۔اس روایت کا ترجمہ ،تخریج اور اسنادی حیثیت مندرجہ ذیل ہے:
ترجمہ:حضرت انس رضی اللہ عنہ سے روایت ہے کہ جناب رسول اکرم ﷺ نے فرمایا:
جب کھانا رکھ دیا جائے، تو جوتے اتار لیا کرو، کیونکہ یہ تمہارے قدموں کے لیے زیادہ راحت بخش ہے۔
حضرت انس رضی اللہ عنہ کی مذکورہ بالا روایت الفاظ کے کچھ فرق کے ساتھ درج ذیل کتب میں ذکر کی گئی ہے۔(سنن الدارمى،حدیث نمبر: 2125،ط:دارالمغنى)(۱)
تخریج الحدیث:
۱۔امام دارمی (م 255ھ)نے ’’سنن الدارمی‘‘( 2/1320)، رقم الحدیث:2125 ط: دارالمغنی) میں ذکرکیا ہے۔
۲۔امام بزار(م 292ھ)نے ’’مسند البزار‘‘(14/90)، رقم الحدیث: 7567، ط: مكتبة العلوم والحكم) میں ذکرکیا ہے۔
۲۔ امام طبرانی (م 360ھ)نے ’’المعجم الاوسط ‘‘(3/295)، رقم الحدیث: 3202،ط: دارالحرمین) میں ذکرکیا ہے۔
۳ ۔حافظ ابو يعلى الموصلى (م307ھ)نے’’معجم ‘‘( 245)،رقم الحديث: 302،ط: ادارۃ العلوم الاثریۃ) میں ذکرکیا ہے۔
۴۔ حافظ ابو يعلى الموصلى (م 307 ھ) نے’’مسند ‘‘(7 /199) ،رقم الحدیث : 4188،، ط:دارالمامون) میں ذکرکیا ہے۔
۵۔امام حاكم (م405 ھ )نے’’مستدرک ‘‘( 4/132) رقم الحدیث : 1729،ط: دارالکتب العلمیۃ) میں ذکرکیا ہے۔
۶ ۔امام ديلمى(م ٥٠٩ ھ) نے’’مسند الفردوس ‘‘(1/274)،رقم الحديث: 1066،ط:دارالکتب العلمیۃ) میں ذکرکیا ہے۔
مذکورہ روایت کی اسنادی حیثیت:
حضرت انس رضی اللہ عنہ سے مذکورہ بالا روایت دو سندوں سے مروی ہے۔
ایک مسند ابی یعلی موصلی میں معاذ بن شعبة اور داود بن الزبرقان کے واسطہ سے ہے اور یہ دونوں راوی متکلم فیہ ہیں۔علامہ سیوطی (م 911ھ)نے اس روایت کے ’’ضعف‘‘ کی طرف اشارہ کیا ہے لیکن علامہ محمد بن اسماعیل الصنعانی (م 1182ھ)فرماتے ہیں کہ یہ روایت شواہد کی وجہ سے حسن کے درجہ سے کم نہیں ہے۔(3)
اور دوسری سند عقبۃ بن خالد السکونی عن موسی بن محمد بن ابراھیم عن ابیہ کے طریق سے ہے، جسے امام طبرانی (م 360ھ)نےالمعجم الاوسط میں نقل کیا ہے اور فرمایا: کہ یہ حدیث انس سےاسی سند سے مروی ہے اس سند میں عقبہ بن خالد متفرد ہیں ۔
حضرت انس رضی اللہ عنہ کی اس روایت کو امام حاکم (م 405ھ)نے صحیح قرار دیا ہے، لیکن امام ذہبی (م 748 ھ)نے ان پر رد کیا اور فرمایا کہ میرے خیال میں (یہ حدیث) موضوع ہے، اوراس کی سند تاریک ہے۔
علامہ ہیثمی(م 807 ھ)نےفرمایا:طبرانی کے رجال ثقہ ہیں مگر محمد بن الحارث سے عقبہ بن خالد کےسماع کےبارے میں مجھے نہیں پتہ چلا۔
شیخ صدیق الغماری (م 1380 ھ)نےفرماتے ہیں : حدیث وضع کے درجہ تک نہیں پہنچتی ہے کہ اس پر وضع کا حکم لگایا جائے خاص کر جب حدیث ابی عبیس بطور شاہد کے بھی موجود ہے۔(۴)
امام بزار(م 292ھ) نےحضرت انس کی روایت کو مسند بزار میں الفاظ کے قدرے فرق کے ساتھ نقل کیا ہے جس کے بارے میں علامہ ہیثمی(م 807 ھ)نےفرمایا: موسی بن محمد بن ابراھیم التیمی ضعیف ہے۔
علامہ سیوطی(م 911ھ)نے اس حدیث کو ’’صحیح‘‘کہا ہے۔(۵)
مذکورہ بالا روایت کاشاهد :
مذکورہ بالا روایت حضرت ابو عبس بن جبیر رضی اللہ عنہ سے مروی ہے۔
حضرت ابو عبس بن جبیر رضی اللہ عنہ کی روایت کو امام حاکم نے مستدرک (۴/۳۹۴)،رقم الحدیث:۵۴۹۶) میں ذکر کیا ہے۔امام ذہبی (م 748 ھ)نے فرمایا:یحی اور اس کا شیخ دونوں متروک ہیں۔(6)
علامہ مناوی (م 1031ھ)نے فرمایا:دوسرے ضعیف طرق سے مروی ہونے کی وجہ سے کچھ اس کو تقویت مل جاتی ہے۔