سوال: کیا عورت کو گھر سے باہر جانے کیلیے چاہے کوئی بھی کام ہو، درس پہ جانا ہو یا بازار جانا ہو، صرف شوہر کی اجازت کافی ہے یا پھر ساس سسر سے بھی اجازت لینی ہوگی ؟ اور اگر شوہر اجازت دیدے، لیکن ساس سسر نہ دیں تو عورت کس کی مانے؟

جواب: عورت کو کسی کام کے لئے گھر سے باہر جانے کے لیے شوہر کی اجازت ضروری ہے۔
واضح رہے کہ عورت اپنے ساس سسر سے اجازت لینے کی شرعی طور پر پابند نہیں ہے، البتہ چونکہ ساس سسر گھر کے بڑے ہیں اور عورت کے خاوند کے ماں باپ ہیں، لہذا اخلاقا اور مروتا ان کا دل جیتنے اور گھر میں محبت اور الفت کا ماحول قائم رکھنے کے لئے ان سے اجازت لینی چاہیے، اس کی مثال یوں سمجھیے، جسے: آپ بس میں سیٹ پر بیٹھ کر محو سفر ہوں، اس اثناء میں کوئی بوڑھا آدمی یا عورت آپ کے والدین کی عمر کا آ جائے، اگر آپ اپنی سیٹ نہیں چھوڑیں گے تو آپ شرعاً و قانوناً مجرم نہیں ہوں گے، لیکن چونکہ بڑوں کا ادب کرنا ہمارے دین کی بنیادی تعلیمات میں سے ہے اور ہر عمل کی مکافات ہوتی ہے، اس بناء پر آپ کو چاہیے کہ آپ اپنی سیٹ سے کھڑے ہو جائیں اور اس بوڑھے کو اپنی سیٹ پر جگہ دے دیں، تاکہ اللہ پاک آپ سے راضی ہو کر دنیا میں آپ کو آپ کے بڑھاپے میں اس سے زیادہ اچھے سلوک کا بدلہ عطا فرمائے اور آخرت میں اس کا بدلہ مغفرت اور جنت دے کر آپ کو خوش کر دے، بالکل اسی طرح عورت کو چاہئے کہ اپنے ساس سسر کو اپنے والدین کی طرح سمجھے اور ان کے حکم کی اطاعت کرے، تاکہ کل جب یہ بوڑھی ہو جائے تو اس کی آنے والی نسلیں بھی اس کی تابعدار ہوں اور اس کی آنکھیں ان کو دیکھ کر ٹھنڈی ہوں اور اللہ پاک اس سے دنیا آخرت میں راضی ہو۔