سوال: عام طور پر مؤذن حضرات امام کے پیچھے پہلی صف میں کھڑے ہوکر اقامت کہتے ہیں، لیکن ہماری مسجد میں بسا اوقات مؤذن کسی اور جگہ کھڑے ہوکر اقامت کہہ دیتا ہے، آپ سے سوال یہ ہے کہ کیا امام کے پیچھے پہلی صف میں کھڑے ہوکر اقامت کہنا ضروری ہے یا کسی اور جگہ پر کھڑے ہوکر بھی اقامت کہی جاسکتی ہے؟

جواب: واضح رہے کہ امام کے پیچھے پہلی صف میں کھڑے ہوکر اقامت کہنا ضروری نہیں ہے، بلکہ اگر اقامت کہنے والا کسی بھی صف میں کھڑےہو کر اقامت کہہ لے تب بھی اقامت ہوجاتی ہے، تاہم بہتر یہ ہے کہ اقامت کہنے والا امام کے پیچھے کھڑا ہو، کیونکہ عام طور پر اقامت کہنے والا مؤذن ہی ہوتا ہے جو امام کا وضو ٹوٹنے کی صورت میں اس کی نیابت کرتا ہے۔